ORANJESTAD (AAN): Fotografonan di Aruba Birdlife a capta momento cu dos vehiculo tipo UTV tabata core roekeloos mey-mey di e area protehi di Bubali Plas,
spantando monton di parha y destrui naturaleza. Nan a publica potret di e turistanan y e nummerplaat di vehiculo. Esaki a crea un ola di reaccion den pueblo cu a desaproba e actitud di e turistanan.
E siman aki, Aruba Offroad Foundation a reacciona riba e susedido. Segun e fundacion, nan a tuma nota recien di articulonan cu ta worde publica contra di compania nan di tour di ATV y UTV mas no ta conta e storia completo.
Aruba Birdlife a publica varios potret ta highlight number di UTVs cu tabata coriendo irresponsabel y causando daño na nos naturalesa, es mas a publica esaki pa un biaha mas pone un lus negativo riba e tipo di atraccion aki.
Aruba Off Road Foundation a tuma nota di esaki y a follow up cu tur su miembro nan mesora y a logra constata cu en berdad e tabata un tristo sucedido pero esaki a worde rectifica door di e compania. Na momento cu e doño di compania a worde avisa di e iresponsabilidad di e turista nan aki, el a tuma accion, pues a bay kita e vehiculonan for di nan y a laga nan busca otro manera pa yega nan hotel back.
Segun e Fundacion, ta di lamenta cu ta keda purba di perhudica compania nan cu a keda hopi luna cera y cu ta purbando di lanta cabes poco poco pa por sobrebibi y mantene tur trahado den labor pa asina por sigui bay dilanti.
Pa medio di esaki Aruba Off Road Foundation un biaha mas kier enfatisa e importancia di traha hunto pa nos por yega na un balance cu ta beneficia tur esnan concerni. Ta importante pa corda cu tur storia tin dos banda. Compania nan ta haci nan best pa mantene e tour nan safe y huur e machine nan aki bou di tur condicion y rekisito.
Mester tene na cuenta si cu no semper por garantiza cu tur turista lo tene nan mes na regla, pues ta pidi pa comprension y cooperacion pa avisa compania nan mesora cu wak algo no ta canando bon y duna nan e chens pa remedia esaki.
