ORANJESTAD (AAN): Sector Cuido Mayor y Yiu di Wit Gele Kruis kier a informa mayornan di muchanan naci na 2016 cu den e luna di juni lo cuminsa cu e accion di vacunacion.
Wit Gele Kruis lo tuma contacto cu e mayornan via telefon pa traha cita. Ariba e dia di e cita e mayor mester trece e buki geel di vacunacion, pa asina nan por yena e vacunanan ricibi e dia ey.
Si bo persona su number di telefon/ celular a cambia of si bo persona no a haya yamada di Wit Gele Kruis den e luna di juni, tuma contacto cu e oficinanan di Wit Gele Kruis mas cercano.
Wit Gele Kruis ta pidi mayor pa nan cooperacion pa cu e accion aki, pa asina logra vacuna mas mucha posibel naci na 2016.
