ORANJESTAD (AAN): Santa Rosa ta pidi cooperacion di henter comunidad, especialmente e Amigonan di Santa Rosa, pa yuda nan cu simia di fruta of berdura cu pueblo por tin.
Manera aña nan anterior, Santa Rosa tin un programa di plantacion hunto cu Scol pa Ofishi, caminda cu nan ta ofrece pochi, gordura y tur tipo di simia pa e mucha nan por uza como material di les, pa nan educacion dirigi riba horticultura.
Despues cu e mata nan crece, esaki nan ta bolbe back Santa Rosa pa worde bendi cu comunidad. E ta aporta cu menos importacion di mata di fruta di afo, dus menos carbon footprint y ta stimula e hoben pa contribui den un forma activo na sostenibilidad den Agricultura.
Santa Rosa su deseo ta pa den futuro tin nan propio banco di simia, pa cual motibo nan ta boga regularmente riba e importancia pa colecta y warda tur simia natural pa worde planta despues.
Pa tur esnan cu ta desea di contribui cu simia di fruta y berdura, por entrega esaki nan cerca señora Carola Geerman of yama na 585-8102 pa mas informacion. Di antemano, masha danki di antemano pa contribui cu e hobennan y cu Santa Rosa. Union ta haci forsa.
