ORANJESTAD (AAN) – Paola Harper ta e artista invita pa Museo Arkeologico Nacional Aruba (MANA), pa e celebracion di Dia di Himno y Bandera, otro siman, dia 18 di Maart 2025.
Den un entrevista Paola a splica cu e idea ta pa e mustra algo di arte y obra di man y hunto cu su colega Silvia Isenia nan a crea un estilo di yabero chikito, di cual nan lo duna un tayer di trabao dia 18 di Maart na MANA.
E Idea ta pa siña algo facil cu tur persona por haci, tanto mucha como adulto. Paola tin 14 aña bibando na Aruba, y su expectativa ta siña arte, for di su filosofia cu tur persona tin artista dentro di su mes, y den e ocasion aki mester explota e creatividad aki.
E ta un artista innato. E ta pinta for di mucha, pero pa e obranan di man el a siña na Aruba mes, ocho aña pasa. Como pintor profesional e tin cuater aña. Paola a extende un invitacion na henter pueblo di Aruba, pa nan bin den famia completo, pa trece e welo y welanan, mucha, etc., pasobra e idea ta pa disfruta di e dia aki den famia.
