Parlamentario Otmar Oduber, lider di PPA:
*Pero contestanan den e prome ronda tabata “mi no sa”, “nan no sa”
ORANJESTAD (AAN) Dialuna 10 di Maart Otmar Oduber, Lider di fraccion di PPA, a yama un conferencia di prensa den cual el a referi na tres tema, esun prome ta e reunion publico cu el a pidi tocante e caso di tiramento ya conoci.
Na prome lugar Oduber a manda palabranan di sosten y apoyo na e lucha cu ta continua den e caso lamentable di tiramento, unda un hoben di apenas 19 aña a perde su bida.
E parlamentario di PPA, a comenta cu manera ta conoci su fraccion, dos pa tres siman pasa a cuminza un proceso pa yama un reunion publico pa atende cu e situacion aki, den tur su extension: loke e ta nifica pa e famia, pa nos comunidad en general y sigur pa e relacion cu mester tin cu nos Cuerpo Policial, como tambe cu e diferente instancianan hudicial cu tin aki na Aruba.
Oduber a indica cu despues cu nan tabatin un reunion cu e Comision Permanente di Husticia di Parlamento, cu Cuerpo Policial y Sindicato di Polis SPA, nan a haya hopi informacion den e encuentro aki. E lider di PPA a bisa cu e ta gradici Sindicato SPA, pa a manda pa Parlamento di Aruba, pa fraccion di PPA, y nan a comparti esaki cu tur otro fraccion di Parlamento y un lista di preocupacion cu tin, hasta mancamento cu tin den KPA. Oduber ta kere cu esaki ta prome biaha den añanan cu nan ta haya un documento cu a wordo prepara den e caso aki, pa Sindicato di Polis, na un forma transparente manera nan a wordo pidi, y e tin palabra di elogio pa e Sindicato.
El a reitera cu fraccion di PPA a comparti e documento aki cu e otro fraccionnan, mirando e seriedad cu tabata tin den e caso pa cual nan a pidi reunion publico, siman pasa.
El a agrega cu PPA ta gradici tambe e Korpschef señor Ramon Arnhem, cu den e reunion aki tabata hopi transparente y bastante “hot” (cayente) den e prome ronda di e reunion aki practicamente no kier a duna informacion.
“Ni SPA, ni Cuerpo Policial y manera nan mes a bisa na final di e reunion n’a mi personalmente, nan lo a bin cu un actitud y pensamento mescos cu den ruedanan di prensa na otro momento, di contesta ‘mi no sa’, ‘nan no sa’. Esaki tabata palabranan di tanto e Korpschef como di e Presidente di SPA, y esey ta loke a sosode tambe”, Parlamentario, y lider di PPA, Otmar Oduber a señala.
