‘Subi salario minimo ta un bon plan’

Tijs van den Brink di CDA ta opina encuanto plan di Mike Eman:

ORANJESTAD (AAN): E parlamentario di CDA, Tijs van den Brink, a expresa su aprecio pa e plan di Prome Minister Mike Eman pa aumenta salario minimo na Aruba y conecta esaki cu bestaansminimum, pa asina percura cu e prosperidad economico di Aruba beneficia henter comunidad.

   Van den Brink a haci e declaracion aki despues di un reunion entre Prome Minister Eman y su delegacion cu e Comision Fiho pa Relacionnan den Reino (Vaste Commissie voor Koninkrijksrelaties) di Tweede Kamer na Den Haag. E delegacion di Aruba tabata inclui Minister Plenipotenciario Mildred Schwengle y Minister di Turismo, Transporte y Labor, Wendrick Cicilia.

   Durante e reunion, Prome Minister Eman a presenta su vision tocante e desaroyo economico y social di Aruba, incluyendo su plannan pa aumenta salario minimo y e diferente tensionnan cu ta existi rond di e propuesta. Segun Van den Brink, e vision di Prome Minister Eman ta pone e bienestar di henter comunidad central. "Si turismo na Aruba ta bay bon, ta importante cu henter sociedad di Aruba beneficia di esaki," Van den Brink a declara. E parlamentario di CDA a indica cu e ta compronde e deseo di Prome Minister Eman pa conecta salario minimo cu bestaansminimum, pa asina e famianan den e barionan di Aruba cu tin dificultad pa cubri nan gastonan diario por beneficia tambe di e prosperidad cu turismo ta genera.

   "Esey ta un bon plan!," Van den Brink a enfatisa.

   El a compara e situacion di Aruba cu Hulanda, caminda tambe tin discusion tocante con pa distribui prosperidad economico entre ciudadnan y region mas paden di Hulanda pa asina mas habitante por beneficia di e crecemento economico.

   Tijs van den Brink ta miembro di Tweede Kamer pa CDA for di november 2025. Prome cu su entrada den politica, e tabata un periodista y presentador conoci na Hulanda, entre otro pa Evangelische Omroep (EO). Actualmente e ta encarga tambe cu Relacionnan den Reino den e fraccion di Christen-Democratisch Appèl.

   Na Aruba, Gobierno bou di liderazgo di Prome Minister Mike Eman ta sigui trahando riba un propuesta pa aumenta salario minimo gradualmente y acerca e na e nivel necesario pa cubri gastonan basico di bida. E iniciativa ta forma parti di e esfuersonan pa combati pobreza, mientras Gobierno ta sigui busca manera pa dialogo cu sindicatonan y gremio por continua.