Colaboracion cu Aruba Conservation Foundation
ORANJESTAD (AAN): Aruba Conservation Foundation (ACF), como un organizacion independiente dedica na maneho di conservacion, recientemente a ricibi un presentacion for di un grupo di studiantenan di Universidad di Aruba y NHL Stenden di Hulanda. Pa di dos aña como parti di ACF su colaboracion cu Universidad di Aruba, studiantenan a ricibi un case study pa por desaroya concepto pa transforma Hofi Fontein den un centro MICE sostenibel (Meetings, Incentives, Conferences & Exhibitions).
E proyecto a worde desaroya como parti di les pa e facultad FHTMS, y ta directamente alinea cu e Plan Strategico Multi Annual di ACF (MACS) 2023–2032, cu ta enfoca riba tres pilar: (*) Ecosistema Natural Sostenibel: naturalesa diverso, saludabel y resistente. (*) Experiencia Transformacional Sostenibel: conecta hende cu naturalesa den un manera significativo. (*) Operacion Sostenibel: un modelo ehemplar di sostenibilidad y responsabilidad social.
Case study: Un vision nobo pa Hofi Fontein ta principal aki. Pa esnan cu no sa, Hofi Fontein ta localisa den Parke Nacional Arikok y ta un di e luganan mas valioso cultural y ecologicamente na Aruba. Conoci pa su fuente di awa fresco, vegetacion nativo, y cueba historico cu pinturanan indigena, Fontein ta un simbolo di union entre herencia natural y herencia cultural. Hofi Fontein ta un edificio historico cu por bira un hub pa reunionnan, evento cultural y actividadnan educativo.
Den e ultimo tres lunanan, e studiantenan a bin ta explora diferente manera pa converti e espacio pa multi-uzo sin perde su caracter historico. Nan propuesta ta inclui practica sostenibel manera uzo di panelnan solar, conservacion di awa, reduccion di deperdicio, y programanan cu ta inspira un conexion profundo cu naturalesa y honra cultura local.
E colaboracion entre ACF y Universidad di Aruba ta conecta conocemento academico cu reto real di conservacion, inspirando e generacion nobo pa tuma parti den e construccion di un Aruba sostenibel cu ta respeta su naturalesa.
ACF ta gradici e studiantenan pa e presentacion y ta deseanan tur clase di exito den nan estudio. ACF ta keda habri pa colaboracion cu instancianan academico pa reforsa esfuersonan di conscientisacion y educacion pa loke ta nos herencia natural su balor.
