Iniciativa importante entre gobiernonan
ORANJESTAD (AAN): Di mas guia ora di scoge estudio, te intercambio di stage y di estudio. E programa ‘Education Alliance’ (SEA) ta un iniciativa importante entre gobiernonan y instansianan di enseñansa di Aruba, Corsou, Sint Maarten y Hulanda. Su meta ta pa haci transicion pa enseñansa superior mas facil y prepara studiantenan miho pa un estudio na Hulanda of otro caminda. Awe a prolonga e programa aki pa aumenta exito den estudio pa studiantenan Caribense te cu 31 di december 2028.
Esey ta un di e palabracionnan cu a haci durante e Consulta di Ministernan di OCW di e cuater Paisnan (M4LO) na Boneiro. Anualmente e ministernan di enseñansa, cultura y ciencia di Aruba, Corsou, Sint Maarten y Hulanda ta reuni durante e M4LO. Hulanda ta representa Boneiro, Sint Eustatius y Saba tambe durante e consulta aki.
Minister Moes: ”Nos kier haci maximo uzo di tur talento den nos Reino. Hunto cu mi coleganan di e otro tres paisnan di Reino, nos a traha duro e ultimo añanan riba mas colaboracion entre e region Caribense y Hulanda riba tereno di enseñansa, cultura y ciencia. Y cu exito. Por ehempel a crea un red fuerte di docente, guia y personal di apoyo na Hulanda y riba e islanan, cu ta sostene hobennan di e parti Caribense di Reino ora di haci escogencia di estudio adecuado y desaroya nan talentonan.”
E programa SEA ta ofrece entre otro mas beca di Reino pa studiantenan riba nivel MBO, HBO y Academico pa intercambio di estudio of stage den otro partinan di Reino Hulandes. Ademas nan ta ricibi miho guia. Na Hulanda por ehempel instancianan di enseñansa profesional superior (academia) y di enseñansa profesional secundario (MBO) ta colaborando den e programa di SEA, pa haci cu studiantenan Caribense por drenta y sigui avansa mas miho. Mas y mas instancia di enseñansa superior y di enseñansa profesional secundario entretanto tin dianan di introduccion special of programanan di mentor pa hobennan procedente di e area Caribense. Cada aña mas di 1600 hoben procedente di e parti Caribense di Reino ta inicia un estudio na Hulanda.
Ademas e ministernan a dicidi pa colabora cu instancianan di enseñansa pa promove ‘braingain’ (retene y trece talento bek). E proposito ta pa interesa hobennan pa traha na e parti Caribense di Reino, pa asina combati falta di personal.
Un otro paso pa fortifica enseñansa den e parti Caribense di Reino ta expansion di e aliansa exitoso "Kibrahacha". Te ainda e programa aki ta concentra riba formacion di maestro pa enseñansa primario na Aruba, Boneiro y Corsou. Denter di poco ta bin acerca formacion di docente di enseñansa secundario y enseñansa profesional secundario.
Ademas Sint Maarten y Hulanda ta studiando si por inicia un iniciativa similar na Isla Riba. Kibrahacha ta combina formacion di maestro tradicional cu experencianan di practica den klas. Maestronan di scol ta hunga un papel importante ora di guia futuro maestronan na boca di trabou.
Finalmente durante e M4LO a stipula un procedura pa presenta nominadonan pa e lista di Patrimonio Cultural Inmaterial di Unesco na nomber di Reino completo. E profesion di mulado, e cultura di desfile of parada floral (corsocultuur) y zomercarnaval na Rotterdam ya ta riba e lista aki na nomber di Hulanda.
