Parlamentario Dangui Oduber a mustra:
- Esey compara cu apenas seis luna pasa
- Pesey frishidernan ta bashi rond e isla
ORANJESTAD (AAN): Mas dia pasa mas ta bira obvio cu e gobierno di Avp-Futuro a gaña tur hende y tuma tur hende haci. Ambos partido tanto AVP como Futuro a hiba un campaña cu nan lo mehora poder di compra, reduci costo di bida, percura pa no tin inflacion y percura pa tur prijs na Aruba baha. Geoffrey Wever te hasta a bisa cu frishidernan na Aruba ta bashi y cu partido Futuro lo percura pa yena e frishidernan bek.
Esey ta loke Parlamentario Dangui Oduber di MEP a trece dilanti. E ta mustra cu awe despues di 8 luna di gobernacion e realidad ta otro. Awe tin inflacion, no tin caminda mas pa pueblo sconde pa sla di prijs di Geoffrey Wever y Gabinete AVP-Futuro. Prijs di coriente NO a baha, prijs di awa NO a baha, prijs di gas a subi danki na Geoffrey Wever y prijs di comestibles ta mas halto cu nunca. Placa no ta yega y frishidernan a bira mas bashi cu aña pasa.
No ta nos ta bisa esaki si no esaki a wordo confirma pa banco central por medio di un survey cu a wordo haci pa nan. Nada menos cu 88% di consumidornan Arubano ta bisa cu nan por cumpra menos cu seis luna pasa. Esaki ta sali for di e ultimo Consumer Confidence Survey di Banco Central di Aruba (CBA) pa e segundo cuartal di 2025. Banda di Banco Central, Centrale Bureau Statistiek (CBS) tambe a indica cu den luna di September 2025 e poder di compra a bay drasticamente atras compara cu aña pasa September 2024.
E poder di compra na Aruba ta bao mas presion cu nunca. Segun e mas reciente rapport di Centraal Bureau Statistiek (CBS), ta resulta cu den september 2025, hogarnan mester di hopi mas placa pa por sobrevivi e luna compara cu un aña pasa. Specialmente famianan y personanan cu entrada abou ta sinti e presion cada bes mas fuerte.
Un famia promedio tin mester di 6.622 florin den September 2025 pa cubri e necesidadnan basico. Pa un persona so, e montante ta 3.204 florin den September 2025. Den september 2024 esakinan tawata 6.109 florin y 2.944 florin respectivamente. Esaki ta representa un aumento anual di mas cu ocho por ciento (8%). Esaki ta wordo causa pa un aumento explosivo di prijsnan di comestiblesnan, netamente loke nos ta bin ta señalando pa varios luna. Anto esaki ta un gobierno cu a priminti cu nan lo mehora poder di compra y costo di bida lo baha.
Awe despues di 8 luna e realidad ta otro. Hendenan no tin placa pa gasta, tin inflacion, tin aumento di gasto pa famianan y no tin confiansa den nos economia. Awe un tin caminda pa sconde pa prijs mas na Aruba. E situacion no a bira mihor manera a ser priminti y es mas e situacion a bira peor. Unda cu bo bira tin aumento di prijsnan explosivo. Ningun prijs na Aruba a baha, costo di bida no a ser mehora y poder di compra ta keda bai atras.
Minister Geoffrey Wever a bisa cu e ta traha riba un ‘’koopkrachtmodel” pa mehora e poder di compra pero pueblo si no tin pasenshi mas pa warda ki dia e modelo aki lo keda cla. Tur dia pueblo ta sinti efectonan di prijsnan na Aruba. Tarifa di awa no a baha, tarifa di coriente no a baha, prijs di gasoline NO a baha, prijs di diesel no a baha y no papia mes di prijsnan den supermercadonan. Kico Gobierno ta bay haci pa alivia pueblo anto?
