Studiantenan di Universidad di Aruba a duna nan presentacion di Comprehensive Business analysis

ORANJESTAD(AAN): Na Universidad di Aruba (UA) tabata tin presentacion di un proyecto yama Comprehensive business analysis y segun Jorrit van Spaendonck,

kende a duna e curso aki, e tin como meta pa crea profesionalnan di negoshi, cu ta studiantenan cu di berdad sa con pa analisa un compania riba tur nivel relevante, manera finanzas, operacionnan, etc.

Den un entrevista cu studiante Andrea Sousa Abreu, el a splica cu e studiantenan mester a analisa varios caracteristica di e companianan, por ehempel con activo nan ta den e mercado y con nan situacion di finanzas ta.

Tur aña UA ta scoge diferente sector pa analisa.

E aña aki a scoge companianan cu ta bende producto y servicionan pa cacho, cu ta anota den e asina yama New York Stock Exchange.

Ta trata mas tanto di companianan Mericano.

E grupo di studiante di UA cu a participa na e curso aki tabata tin diferente tarea pa haci, como tambe skirbi un rapport y na final nan a duna nan presentacion final riba tur e trabaonan cu nan a haci durante ultimo lunanan.