Ivo Valdes, Presidente di OPPA:
ORANJESTAD (AA)—Ivo Valdes, Presidente di e Organisacion di Pensionadonan Publico di Aruba, a bisa den entrevista cu DIARIO, cu e tabata cla pa bay cerca Gobernador, y e tabata tin tur su documentonan cla.
Valdes a expresa cu priminti ta facil, cumpli ta e cos! E ta referi na tur e sorpresanan cu ta wordo haci na pueblo durante campañanan politico.
“Anto nos ta fada di tanto promesa y mas ainda pasobra e hendenan cu mi ta representa, ta hendenan cu ta cumpli na Aruba; nan a traha, nan a forma locual tin na Aruba. Ban duna nan un gradicimento pa locual nan a haci”, Ivo Valdez a señala.
Valdes a agrega cu si esnan jong, ora bo tin un bon sistema di pensioen pa nos grandinan, mañan ora bo ta pensionado, bo tambe ta gosa di dje. Dus, no ta por nada loke OPPA ta bringando p’e.
Ivo Valdes a haci e pregunta aki: “Como politico cu falta bo cabes? Si mi mira cu algo ta robes, mi ta trece dilanti, cu intencion pa nan drech'e. Pueblo a scoge un gobierno, e tin derecho di reclama si e no ta traha manera e kier. Si no por traha na esey, baha na awa, laga otro politiconan cu si por, tuma bo puesto, pero no bin critica mi pasobra mi ta critica bo maneho” Valdes a señala.
El a subraya cu e no ta critica un partido sino e maneho cu nan ta hibando pa e pais aki. “Anto bo n' por bisa cu bo tin surplus aki, surplus aya, anto unda e surplus den e cartera di e ciudadanonan ta? Esey ta locual nos ta treciendo dilanti. Anto semper, tur gobierno tin e tendencia di tuma decisionnan sin scucha e pueblo.
Valdes a expresa cu den campaña hopi politico ta bishita cas pasobra nan kier scucha pueblo, pero un bez cu nan ta sinta den nan oficina, of departamento ya nan no kier scucha pueblo mas!
“Mi a reuni cu varios grupo politico, y a bisa nan cu, cu mesun facilidad cu nan a haya mi pa scucha mi preocupacionnan y di OPPA, mañan cu bo ta den gobierno, mi kier e mesun facilidad pa yega na bo tambe si algo robes sosode”, Ivo Valdes, presidente di OPPA a expresa remarcando cu p’esey OPPA tey, cu nan a un organizacion pa mantene e gobernacion skerpi.
