Studiantenan di Havo-5 bayendo pa exterior a haya sa con pa maneha presupuesto

Bon iniciativa di Ministro y Fundacion Plan di Bida

ORANJESTAD (AAN): Recientemente, Minister di Enseñansa Endy Croes a bishita Colegio Arubano, unda cu Señora Paloma Osorio di Fundacion Plan di Bida a duna un presentacion di presupuesto na e studiantenan di Havo 5 cu ta bay continua nan estudio den exterior.

   E meta di Fundacion Plan di Bida ta pa trece conscientisacion den comunidad di Aruba, ofrece ayudo y guia riba maneho di finanzas. Fundacion Plan di Bida a siña e hobennan con pa presupuesta y biba di acuerdo nan presupuesto. Un mal maneho di presupuesto, por trece problema financiero, problema psicologico y problema den comportacion.

   E mandatario di Enseñansa ta trahando den colaboracion cu Fundacion Plan di Bida cu e proposito di siña nos studiantenan di Aruba cu ta bay studia den exterior pa tin un bon maneho di e prestamo cu nan ta ricibi pa nan estudio.

   Minister Endy Croes ta felicita Fundacion Plan di Bida pa e tremendo trabao cu nan ta haciendo y ta gradici nan pa yuda nos hobennan pa ta miho prepara pa ora nan bay leu di cas.