Minister di Finansa:
*Na 2024 Aruba lo lidera CFATF
ORANJESTAD (AAN): Siman pasa Aruba tabata sede pa e expertonan di Caribe discuti integridad financiero den nos region den e 57 Reunion Plenario di Caribbean Financial Accion Task Force (CFATF.) Un total di 279 delegado di 29 Pais miembro di CFATF tabata na Aruba pa e reunionnan cu a tuma luga na Hilton Hotel di diadomingo 25 di november te cu diabierna 1 di december.
E Plenario di CFATF a conta tambe cu representantenan di Canada, Estados Unidos, Mexico, Spaña y Reino Uni. Aruba a yama bon bini tambe na oficialnan di e organisacion global Financial Accion Task Force (FATF), entre nan, sr. Jeremy Weil cu ta Vice Presidente di FATF, y tambe di ehecitivonan di IMF, Banco Mundial, Unidad Regional di Recuperashon di Activo y Caricom IMPACS, como observadornan di e reunionnan plenario di CFATF. Di Aruba a participa un delegacion di 19 funcionario di, entre otro, Banco Central, Financial Intelligence Unit di Aruba y Ministerio Publico.
CFATF tin dos reunion plenario pa aña pa discuti, entre otro, e status di varios proyecto cu ta wordo ehecuta pa diferente grupo di trabou, y pa duna miembronan un update tocante e desaroyonan mas recien relaciona na e recomendacionnan di FATF pa preveni y combati labamento di placa, financiamento di terorismo y profileracion di arma di destruccion masivo.
Dos punto di agenda principal cu a wordo trata na e reunion plenario na Aruba, tabata e raportnan final di Evaluacion Mutuo di British Virgin Islands y di Saint Vincent and The Grenadines. Tur dos raport a wordo aproba pa e reunion plenario di CFATF.
E reunionnan na Aruba a wordo lidera pa e actual presidente di CFATF cu ta Procurador General di Cayman Islands, Sr. Samuel Bulgin. Aruba ta e vice-presidente di CFATF y e Director di Financial Intelligence Unit (FIU) di Aruba, drs. Angelo Brete ta asumi e responsabilidad aki pa nos Pais.
Ta un custumber cu e pais cu ta tuma e presidencia di e organisacion pa e aña siguiente semper ta anfitrion di e reunionnan den luna di november. Pa e motibo aki tambe Aruba tabata cede di e reunion Plenario di CFAFT ya cu proximamente sr. Angelo Brete lo fungi como presidente di CFATF.
Enbista di e topiconan cu a wordo trata, tur e reunionan tabata accesibel solamente pa miembronan di CFATF y nan invitadonan. Asina mes Gobierno di Aruba a percura pa e participantenan por a goza di e hospitalidad di nos Pais. Minister di Husticia di Aruba a ofrece un recepcion pa yama tur delegado bon bini dialuna anochi rond di e piscina di Hilton Hotel. Diaranson mainta, Minister President a declara e reunionan oficialmente habri den presencia di Gobernador di Aruba, funcionarionan di CFATF, hefenan di departamento di e Ministerio di Finansa, representantenan di sector priva y e delegadonan.
Diaranson anochi, Minister President a ofrece un recepcion pa e hefenan di cada delegacion na Museo Archeologico di Aruba. Finalmente, Minister di Finansa y Cultura a organisa un anochi cultural pa henter e grupo cu a bishita Aruba, pa nan por a tuma un ‘break’ di nan trabou y cera conoci cu e cultura di Aruba.
Por mira bek riba un siman exitoso di reunion Plenario di CFAFT danki na e esfuersonan haci pa e secretariado di CFATF y e team di Aruba lidera pa sr. Angelo Brete di FIU cu a percura pa e bon organisacion.
