ORANJESTAD (AAN): Recientemente, 29 studiante di Facultad di Hospitalidad y Turismo (FHTMS) di Universidad di Aruba (UA) como parti di nan curso di “Meetings, Incentives, Conferences and Events (MICE) Management”
a presenta nan ideanan y a elabora ariba e nuebe evento cu nan lo ta organisando. Durante ful e luna di April, cual ta e “Global Volunteer Month” ta celebra e trabou di boluntarionan mundialmente, ta enfoca ariba e importancia y balor di un boluntario.
E proyecto ta un ehercicio cu ta permiti nuebe (9) grupo di studiante aplica e conocimiento acumula di e teoria pa planea, organisa, y ehecuta un evento special pa recauda fondo pa un instancia den nos comunidad. E meta di e proyecto “Special Fundraising Event” ta pa desaroya e conocimiento y abilidadnan di e studiantenan, pero mas aun motiva y involucra nan pa duna bek. Como futuro lider e aspecto aki ta un parti cardinal den nan desaroyo y nan compromiso cu comunidad.
Recientemente e gruponan a “pitch” nan idea / concepto na representantenan di AHATA, QUOTA Aruba, ECO DMS, y Setar N.V. Nan presentacion a inclui informacion di e instancia, motibo dicon a scohe esaki, tipo di evento, con lo mercadea e evento, recursonan cu mester pa ehecuta (voluntario, cuminda, fondo, y mas). E meta tras di e presentacion tawata pa nan ricibi feedback ariba nan evento for di e expertonan di industria y ricibi sosten pa por ehecuta esaki.
“Cu e proyecto kier logra pa e studiantenan pone den practica locual cu nan a siña durante e semester. Organisa un evento no ta algo facil, ta rekeri abilidadnan manera flexibilidad, creatividad, originalidad, bista pa detaye, initiativa, maneho di tempo, comunicacion, resolucion di problema y mucho mas. E meta adicional ta pa no solamente educa e mente, pero tambe e curason,” señora Jo-Anne Croes docente di e curso a subraya.
FHTMS ta invita pueblo di Aruba pa bishita e diferente eventonan y sostene studiantenan cu ta trahando duro y di curason pa nos comunidad.
