Ta ken lo para responsable:
ORANJESTAD (AAN) – Matutino DIARIO ta bolbe haya razon, despues cu na hopi oportunidad, a yega di trece na conocimento di esnan cu ta uza e machine pa corta yerba banda di caminda, cu e forma cu nan ta realiza e trabao, no solamente ta peligroso pa esun cu ta usando e machine, ya cu hopi biaha nos pa constata cu ta haciendo e trabao sin e proteccion adecuado, pero mucho mas pa e automobilistanan cu ta pasando den cercania cu e trabaonan aki ta tumando lugar, ya cu atrobe, e forma con e trabao ta worde ehecuta, sigur no ta conta cu e sistema di prevencion pa accidente tuma lugar, afectando e automobilistanan di loke por sali bula, pero ta parce cu e conseho y reclamo aki, nunca ta worde aprecia pa esnan cu ta haci e trabao aki y mucho menos pa D.O.W cu ta esun cu ta responsable pa duna e contratistanan aki e trabao banda di caminda.
Dialuna atrobe tabatin un caso, caminda un automobilista pasando ariba e caminda principal dilanti sucursal di NV Elmar na Hato, diripiente ta tende un zonido duro na e parti patras di e auto, acompaña pa explosion di e bentana. E señora a para na banda di caminda y a bin constata cu ta un piedra a dal e glas kibra.
Mesora a tuma nota cu net dilanti NV Elmar, un di e contratistanan chikito aki, tabata usando un di e mashinnan pa corta yerba y tabata lanta piedra benta unda cu ta, cu e consecuencia, cu e piedra a bula dal e bentana di auto kibra. E pregunta awor ta, te ki dia DOW ta sigui laga e cosnan aki sigui tuma lugar?
Hecho ta cu ora bo ta cortando mata asina, e contratista suppose di rek un net a lo largo di caminda pa asina proteha autonan cu ta pasa pa nan no haya piedra cu ta bay dal den bentana of body di auto.
{gallery}Mashin di corta yerba banda di caminda a pone piedra bula dal den auto di un dama, kibra bentana di patras{/gallery}
