ORANJESTAD (AAN): Manera cu DIARIO a trece dilanti caba, tin un experimento andando riba edificio di Contraloria General
pa check si por haya un solucion pa e problema eterno di un edificio bieu construi cu sistema di piedra di coral.
Riba invitacion di Stichting Monumenten Fonds Aruba (SMFA), studiantenan di EPI sector Ciencia y Tecnologia a bishita Algemene Rekenkamer Aruba (ARA) riba dianan 22 y 23 di maart ultimo.
E studiantenan di opleiding Bouwkunde a haya un splicacion detaya tocante e trabaonan di renobacion y e sistema di traha cu calki, tumando lugar na e edificio di ARA situa na Wilhelminastraat 6. Banda di e splicacion di e sistema nobo aki, tabata tin tambe un sesion practico pa asina siña con ta traha cu e calki.
A duna un rondleiding paden di e edificio pa asina por haya un bista completo di e edificio cu ta data di aña 1887-1888. E ta e prome edificio publico y cu a fungi como scol basico. E studiantenan di EPI a mustra hopi interes den e renovacion, tecnica di calki y a haci hopi pregunta tocante mantencion y conservacion di un monumento clase A y su uzo como oficina pa Rekenkamer.
Algemene Rekenkamer hunto cu Stichting Monumenten Fonds Aruba semper ta dispuesto pa contribui na informacion educativo, na bienestar di nos studiantenan y comunidad en general.
