Studiantenan Arubiano y di otro islanan di Reino mester por haya mas ‘kwijtschelding’ pa nan debe di estudio

Hurista Luis Villegas:

ORANJESTAD (AAN): Durante un sesion organiza pa e Commissie Koninkrijksaangelegeheden y Buitenlandse Betrekkingen (CKABB) cu studiantenan Arubiano na Hulanda, hopi tema importante a worde discuti. E reunion tabata enfoca riba entre otro e situacion di vivienda, e reto di idioma, y e obstaculo cu hopi studiantenan ta enfrenta ora nan ta bay studia na Hulanda.

   Luis Villegas, cu ta haciendo su Master’s Staats en Bestuursrecht na Universidad di Amsterdam, a expresa su preocupacion riba e condicionnan di e landsverordening kwijtschelding studieschuld, cu actualmente ta hopi estricto y ta duna solamente un 35% di kwijtschelding. Segun Villegas, esey ta pone hopi presion riba studiantenan Arubiano, especialmente esnan cu ta combati cu idioma, vivienda y adaptacion cultural. Parlamentarionan a menciona cu nan ta bay cuminsa cu un inciativa di ley pa cambia e rekisitonan pa haya kwijtschelding pa libra studiantenan di e Arubalening.

   Sr. Villegas a splica cu e reglanan pa haya kwijtschelding actual, ta hacie dificil pa studiantenan cumpli cune, pasobra no ta facil pa un studiante gradua den e tempo stipula pa su estudio, particularmente ora bo ta worde confronta cu diferente reto den un pais nobo.Sr. Villegas tambe a enfatisa cu e DUO-lening tambe ta un peso adicional, pasobra esnan cu ta desea di bolbe Aruba mester paga esaki back na Florin, loke ta sinti como un carga dobel.

   Segun sr. Villegas, considerando cu aworaki tin mas conscientisacion na Hulanda riba e historia di esclavitud y e relacion den Reino, e ta hopi importante pa evalua e posicion di studiantenan di Aruba, Curaçao, St. Maarten, Saba, St. Eustatius y Bonaire. E ta di opinion cu si Hulanda ta reconoce su papel historico, mester tin tambe un acto concreto cu ta yuda nos studiantenan y cu ta mas husto. Sr. Villegas ta di opinion cu un porcentahe mas halto di kwijtschelding, of incluso un kwijtschelding completo, por ta un paso real pa combati e fenomeno di brain drain y promove brain gain, pasobra asina e studiantenan por bolbe pa nan pais pa contribui cu conocemento y desaroyo.

   El a conclui bisando cu Hulanda tin interes politicamente tambe pa yuda e islanan di e forma aki, pa cada isla tin nan propio experticio y asina reduci e dependencia y duna mas poder y stabilidad den Reino.