Seraida Pemberton-Leonard
*Riba su mes e banchi no ta bay evita cu e hoben comete otro delito
ORANJESTAD (AAN) – Directora di Stichting Reclassering, señora Seraida Pemberton-Leonard, den entrevista cu Matutino DIARIO, a sigui splica cu e banchi pa hoben cu comete delito relativamente leve, tambe ta pa cierto oranan, esta di 7’or di anochi te 6’or di mainta, cu e hoben mester ta na cas. E ora ey Reclassering ta monitorea cu e ta na cas enberdad.
Señora Pemberton a señala cu e banchi riba su mes no ta e guia, pero e banchi hunto cu guia di Reclassering ta e pakete cu e hoben ta bay ricibi, pasobra no por pone un hoben riba banchi so; esaki so no ta bay cambia su mentalidad; e no ta bay evita cu e comete otro delito, pero cu e guia cu Fundacion Reclassering ta bay ofrec’e, a base di dje e ta purba di haci full un pakete p’e.
“Dus, tene cuenta cu e banchi ta pa nos controla e movecionnan pa e hobennan. Envez di sinta den KIA cu tin tanto aspecto negativo cu ne, e hoben ta keda den libertad pero cu e banchi e ta bay limita su movecionnan”, Pemberton a subraya, y a reitera cu un banchi riba su mes no ta bay evita cu un hende comete delito, pero e ta yuda den e proceso di siña. E banchi nan tin e na Curacao y Hulanda, entre otro paisnan”, señora Pemberton-Leonard a menciona.
