‘Shadows in Paradise’
ORANJESTAD (AAN): Recientemente e studiante Dominique Lopez a entrega su tesis na bibliotecaria señora Yosmar Sneek awemainta. Esaki ta titula ‘Shadows in Paradise: a qualitative study investigating social factors contributing to juvenile delinquency in Aruba’ y e ta resultado di un investigacion. Dominique a publica su tesis den cuadro di su estudio di ‘Bachelor of Arts degree’ (Bachelor 2023) na universidad di Maastricht. E topico ta e factornan cu ta contribui na delincuencia hubenil na Aruba.
E tesis ta bira parti di Coleccion nacional di Biblioteca Nacional Aruba. Tanto como documento fisico como digital.
Dominique a dedica e tesis na su mayornan señora Marisol Tromp y sr. Edsel Lopez. Pa e investigacion aki Dominique a consulta y a traha hunto cu 5 organizacion na Aruba cu ta trata cu mucha y hoben manera Orthopedagogisch Centrum Aruba, Korps Politie Aruba, Stichting Reclassering en Jeugdbescherming Aruba, Jeugd en Zeden Politie y Korrektie Instituut Aruba (KIA).
Dominique a gradua como ‘Master of Science in Strategic Corporate Finance’ na Maastricht University, School of Business and Economics. Tema di su tesis tabata ‘Supervisory level commercial bank portfolio optimization. Actualmente Dominique ta studiando pa su PhD den Finance.
