Studiante Davide Amici di Italia a indica cu el a keda encanta cu isla di Aruba y su hendenan

Studiante di intercambio

ORANJESTAD (AAN): E siman aki DIARIO a entrevista e studiante Davide Amici, kende ta un studiante di intercambio (‘exchange student’) procedente di Italia.  E ta studiando economia.

   El a bin Aruba y a sigui lesnan na Universidad di Aruba, unda el a sinti su mes confortabel, y a keda encanta cu e hospitalidad, y e ayudo inmenso cu e tabata ricibi di demas studiantenan, e profesornan, y tambe di e ‘International Office’, kende semper ta cla pa yuda y busca solucion pa cualkier asistencia cu e tin mester di dje.

   Davide ta un studiante di Universidad di Pisa na Italia, y e dianan aki ta su ultimo cu e ta na Aruba.  E tabata su prome biaha bishitando Aruba, y el a encanta cu e isla y su hendenan cu den su palabra “ta hopi amabel”, y e ta sinti cu esaki ta un lugar fenomenal pa pasa vacacion y tambe bin studia.

   El a yuda tambe recien cu e proyecto di ‘Curso di Business Analisis’, y e tabata den Grupo 2 cu a traha riba analisis di e compania Mericano cu yama ‘Wag!’ cu ta un petstore.