‘Studia responsabel y busca balansa entre estudio y bida social’

Minister Thijsen na studiantenan di Amsterdam

ORANJESTAD (AAN)/DEN HAAG: Den stadhuis di Amsterdam a tuma lugar un encuentro pa e studiantenan di Curaçao y Aruba cu e aña aki ta bay cuminsa cu un estudio na un Hogeschool of Universidad na Amsterdam. Municipio di Amsterdam desde 2010 ta organisa e encuentro aki pa yama e studiantenan di e parti Caribense di Reino Hulandes bon bini na Amsterdam.

   Invitadonan special tabata e Ministernan Plenipotenciario di Curaçao, St. Maarten y Aruba, cu ta respectivamente Carlson Manuel, Rene Violenus y mr. Ady Thijsen. Tambe presente tabata directora a.i. di Arubahuis drs. Glenda Hernandez y mentornan pa Amsterdam Lourdes Bramble-Tromp.

   Como parti di e programa e locoburgemeester di Amsterdam Hester van Buren a yama tur e studiantenan bon bini y a bisa di ta contento cu e studiantenan a scohe pa bin biba y studia na Amsterdam. E politico a bisa cu e tin comprension pa e adaptacion cu e studiante ta pasa aden awor cu nan ta Hulanda. Pa ilustra esaki el a conta di su experencia den un intercambio estudiantil na Ecuador. ‘Como un mucha di 16 aña cu a sali for di un pueblo chikito den e parti norte di Hulanda y hayami den un ciudad grandi cu ta Guayaquil cu ta hopi druk.

   Tambe ta bini acerca e clima, e custumbernan y e idioma. Door cu mi no por a papia Spaño mi tabata keda keto. Tambe mi tabata tin e impresion cu tur hende tabata tin pleito, pasobra nan ta papia hopi cu nan man. Pero esey ta nan manera di expresa nan mes, dus mi a tuma esaki over y awor mi ta ripara cu ami tambe ta papia hopi cu mi man. Finalmente mi tabata habri pa e situacion; mi a cuminsa cu e aventura aki y asina esaki a bira un experencia unico di mi bida. Mi ta spera cu esaki tambe pasa cu boso. Tambe sra. Van Buren a bisa e studiantenan cu lo bin temporada dificil, pero persisti y keda kere den bo mes. Y sa cu tin hopi hende cla pa yuda’, asina locoburgemeester Van Buren a bisa.

   Tambe sra. Van Buren a papia di cera amistad pafor di bo mes un comunidad, bira miembro di un organisacion pa studiante asociacionnan deportivo of musical y mira kico tin di haci den bo bario. ‘Mi ta spera tambe cu boso tambe lo duna nos di Amsterdam algo bek y cu por laga bo “footprint” den nos ciudad. Si bo keda of bay bek. Pasobra tur hende for di tur parti di Hulanda y mundo cu a bin Amsterdam a trece nan talento, tradicion y storianan. Y esaki a haci di Amsterdam un ciudad special, colorido y bibito’, segun locoburgemeester Van Buren.

    Minister Plenipotenciario Suplente di Aruba mr. Ady Thijsen a comparti cu studiantenan su experencia di a studia na Leiden y Tilburg. ‘Bo mester ta sigur kico ta bo meta. Y ora cu bo sa exacto kico ta bo meta bo mester carga bo responsabilidad como studiante. Cu esaki mi kiermen studia responsabel. Bo mester busca un balansa entre studia y un bida social. Esaki a traha bon pa mi durante di mi estudio. Mi tin semper tres palabra cu mi a usa durante di mi estudio y despues den mi carera como abogado y politico. E palabranan ta Fe, determinacion y perseverancia,’ segun palabranan di Minister Plenipotenciario Suplente mr. Ady Thijsen cu tambe a desea e studiantenan hopi suerte den nan estudio.

   E programa a continua na unda Tanya Fraai a entrevista diferente studiante tocante nan estudio, e razon pa a scohe pa bin studia na Amsterdam y otro topiconan interesante.  E studiante di Curaçao Ian Peterson cu ta studiante economia na Universidad di Amsterdam a tene un charla den cual el a conta a base di su mesun experencia con e bida di studiante na Hulanda ta y por a duna a base di su experencia algun avisonan util pa e studiantenan nobo.

Na final e studiantenan a participa na un quiz pa mira con bon nan conocimento di Amsterdam ta, sigui pa un introduccion di diferente instancianan cu ta di importancia pa e studiantenan.

Potretnan ta cortesia di Arubahuis