Na Curacao tambe lo a bay busca pluma di avestruz pa su caso
*Antesala pa reunion di Avestruz den Corte ta hopi spectacular
*DIARIO a haya razon cu Benny por haya puesto si baha gobierno
ORANJESTAD (AAN) — Tal manera DIARIO a anticipa na su lectornan na Aruba, e antesala di e reunion di Avestruz den Corte di Husticia di Aruba, lo bira sumamente interesante.
Impresionante ta e ehercito di e Partido di Pueblo di Benny, cu a prepara su mes pa e momento grandi cu nan candidato mas stima despues di Mike, lo mester presenta dilanti Huez acusa di varios caso criminal entre otro ladronicia, soborno y laba placa.
Basta tempo autoridad a tuma pa por a investiga e caso grandi y hasta lo a bay busca pluma di avestruz na un Banco na Curacao, caminda ta papia di Miyon.
Aparentemente e caso no ta un asunto di mucha cu ta hunga kiniki, pero di un asunto di neish di webo grandi di Avestruz cu tin e habilidad pa sconde cara bou santo.
Ta ora lista di nombernan a bira conoci y detencionnan preventivo of pa sostene e investigacion a haya publicidad, publico na Aruba a grita “WOW” y Benny a splica cu e no a haci nada pero cu el a confia hende cu e no mester a confia.
Pues prome cu e reunion di Avestruz den sala di Corte, Benny a duna indicacion cu e kier hala atras di webo y pluma, pero e acusacionnan oficial ta papia claramente di Benny como e acusado mayor y central pasobra tin Benny no por tin e caso di corupcion cu terenonan di Aruba.
E partido di Benny, dirigi pa e amigo del alma di Benny cu yama Mike, a bini cu un contra atake manera a spera.
DIARIO, cu tin su hendenan presente tur momento y tur caminda, tabata na haltura cu Benny lo a subi baracada cu yudansa di su partido, cu den vacacion a bira manera pushi, pero a cuminsa mobilisa nan simpatisantenan cu nan tin registra como miembro.
Segun informantenan pa scrap nomber como miembro ta un problema y esaki ta haci cu hasta hende cu no kier ricibi yamada y bishita mas ora nan cumpli aña, mester acepta e abraso di Mike y otronan di e partido.
En todo caso, Benny Sevinger mes a confirma e informacion di DIARIO cu su partido a motiblisa Pueblo pa pone fin na Gobierno y esaki a cuminsa cu entrega di un carta na Representante di Hulanda na Aruba, cu tempo cu Mike tabata bringa contra Hulanda pa scapa su cara, no tabata e amor mas grandi di AVP.
DIARIO a haya razon den su pronostico cu AVP lo trata na baha Gobierno prome cu e caso Avestruz bira realidad y cu chens ta grandi cu e Honorabel Miembro di Parlamento di AVP, Benny Sevinger ta bira Consehero di Mike Eman si Mike bira Prome Ministro di Aruba , pasobra ningun otro hende den AVP por ni soña cu nan ta bira Prome Ministro di AVP.
Fin di siman ta habri cu su Honorabel Miembro di Parlamento di Aruba, Benny Sevinger riba baricada pa asina na caminda di Corte di Husticia, trata na destrui enemigonan di su partido.
Informantenan ta mustra cu Benny ta den Commando Center di accion pa baha gobierno y lo a laga cantidad di webo (no ta conoci si ta di avestruz) putri, pa tira nan riba su enemigonan.
Mientrastanto Aruba tin su bista fiha riba e abogado di Benny Sevinger cu a indica un dia, cu algo a pasa. Pero den e algo cu a pasa, e no ta pensa cu Benny Sevinger ta culpabel. Palabra ta na Huez.
