'Storing' semper ta keda un 'issue' pa Elmar y ta algo cu lo bay sigui pasa pa diferente motibo  

Anthony Irausquin, Director di NV Elmar:

ORANJESTAD (AAN):  Gerencia di NV Elmar a yama un conferencia di prensa diaranson mainta pa asina duna algun informacion relaciona cu e 'storing' cu a confronta den e ultimo dianan.

            Relaciona cu esaki, Audrey Croes, Vocero di e compania a indica den nan ultimo conferencia di prensa nan a duna un relato di e sucedido cu e kabel di 60 KV na e onderstation na Sabana Blanco cu a sufri daño diamars 8 di Augustus y tambe e pasonan cu nan a tuma pa atende cu e situacion.

            A menciona cu nan lo sigui informa comunidad y e clientenan pa e motibo ey a yama  e conferencia di prensa aki unda cu ta enfoca riba e trabaonan di reparacion andando y tambe e trabaonan cu ta tumando lugar na e estacion di Sabana Blanco.

            Banda di esaki, Anthony Irausquin, Director di NV Elmar, a sigui bisa cu lo ta bon pa inicia cu e trabaonan cu ta tumando na Sabana Blanco, cu e reparacion di e kabel, pero tambe ta bon pa sigui delibera y duna informacion riba e parti di e onderstation nobo, cual ta un station hopi moderno. E parti di e construccion ta practicamente cla y aworaki ta den fase final pa locual ta trata e instalacion, a bisa.

            Segun Irausquin,  a ripara cu tin tambe algun 'issue' pa loke ta e parti di comunicacion. El a indica cu ta bon pa comunidad sa cu Elmar tin un 'draaiboek' y e ta depende na e manera y na e tipo di 'storing' cu tin.

            A agrega cu na momento cu tin un 'storing' ta nifica cu e personanan cu ta na warda. E tecniconan cu ta trahando lo informa nan departamento di PR & Communication y tambe Customer Relation riba e tipo di 'storing' cu tin. Consecuentemente e personanan aki ta informa via Facebook, of na prensa.

            'Storing' semper ta keda un issue pa Elmar y ta algo cu lo bay sigui pasa y por tin diferente tipo di 'storing', a remarca.

            Por tin 'storing' pa motibonan di mantencion, pa motibo di incidentenan, pero tambe por tin 'storing' door di accidente. Esaki ta haci cu coriente ta keda cay afo constantemente. No kier bisa esey, pero e ta bay sigui pasa pa motibo di diferente aspecto.