Diescinco muraya nobo lo wordo pinta durante Artweek

September lo bay ta hopi briyante pa San Nicolas

ORANJESTAD (AAN): Tur spotlight lo ta dirigi atrobe riba San Nicolas entrante Dialuna 4 di September 2023 ora cu Artweek Aruba 2024 lo cuminsa atrobe, y lo inclui Diaranson 6 di September e ArtFashion, y e weekend di 8 cu 9 y 10 di September cu ArtFair mes.

   Esey ta loke Tito Bolivar di ArtisA a divulga Diaranson atardi durante un conferencia di prensa convoca na Courtyard by Marriott.

   Desde aña 2016 caba, e organizacion di ArtisA ta organizando e Aruba ArtFair na San Nicolas cu e idea pa un dia e ciudad aki lo por bira un destinacion pa arte.  Ni 3 aña despues, revista Forbes a nomber San Nicolas como e Street Art Capital of the Caribbean.

   Despues di pandemia, na 2022 a cuminza bek cu Aruba ArtFair danki na apoyo di Aruba Tourism Authority, Departamento di Cultura, Prins Bernhard Cultuurfonds, Unoca, y demas stakeholders cu a sa di aporta na esaki.

   Aki ta unda cu ArtisA a reuni riba nan mes riba nan rol den tur esaki, y a lanza nan mes bek awor como ‘Artweek’.  Cu e nomber aki ta manda mensahe den comunidad, cu nan no ta djis haci tres dia di compra y benta y show di Aruba ArtFair, pero cu tin hopi mas den cas.

   E aña aki a traha un schedule cu ta basta extenso, y diferente muralista lo bay tey pa pinta un di e 15 murayanan nobo cu ta cla pa wordo decora.  Tambe lo bay ‘refresca’ algun mural existente pa nan haya touchup despues di a blikia un poco den solo.  Tambe nan lo tin e famoso ‘Art Talk’ dia 4 di September cu ta diseña pa artistanan pa nan siña e.o. con pa brand nan imagen, con pa ubica nan mes den mercado internacional.  Tambe lo papia di e abolimento di Sclavitud.

   Diaranson 6 di September lo bay tin e ArtFashion cu e aña aki ta carga e tema ‘Unchained’, unda 12 diseñador di moda di Aruba, Curaçao, St. Maarten, Hulanda, Angola, y Medellin lo trece moda cu tin di haber cu abolicion di Sclavitud.

   Lo tin 4 Pop-Up Gallery e aña aki, y special pa esey riba Diahuebs 7 di September lo bay tin un VIP Night, cu ta un evento pa recauda fondo.  Aki esnan VIP cu participa, lo haya chens di bay tour e cuatro galerianan aki cu e curator Renwick Heronimo, y ta bay cena hunto cu e organizadornan global y muralistanan, rondona pa creatividad.  E anochi aki, e cada VIP tin chens di ta e prome cu por cumpra e artenan aki tambe.

   ArtFair lo bay ta dianan 8, 9, y 10 di September den cayanan di San Nicolas, y lo bay tin hopi mas Pop-up Restaurant cu ta inclui varios bendedor di cuminda, foodtrucks, preparadornan di sushi, y entretenimento e.o. Tsunami, Honeypot, y varios DJ.  Tres dia di diferente entretenimento, incluyendo e ganadornan di ‘Gang di Arte’ di 2023.

   Tres dia unda mas di 100 artista local y internacional ta presenta nan obranan di arte.  Den pasado tin artista cu a participa pensando cu nan ta djis yuda e evento social, y na final a keda sorprendi cu nan a logra bende tur nan obra.

   ArtFair ta un actividad unda artistanan local ta logra bende nan obranan!  Pues e ta un win-win situation.

   Diferente muralista ta bin, no djis di exterior, sino cu den localnan mes tin gruponan cu ta creciendo mas.

   Tito Bolivar a indica cu nan ta contento cu e sosten y empuhe grandi cu nan ta ricibi di Aruba Tourism Authority, y tambe e aña aki di Courtyard by Marriott.  El a bisa cu ya caba por cumpra ticket riba nan website artweekaruba.com pa diferente evento.