ORANJESTAD (AAN): Stichting voor Verstandelijk Gehandicapten Aruba a wordo lanta dia 9 di december 1964 dor di meneer P. Harting,
meneer A. de Vries y señora C. van den Berg. Nan a ripara cu tabata hopi necesario pa Aruba tin scol special, pasadianan pa mucha y adulto, centro pa train trabao y cas pa cuido 24/7 pa persona cu un discapacidad intelectual.
Nan a traha un plan prome y a cuminsa busca fondonan. Na aña 1973 a habri pasadia bibito pin. Scol dun’un man a habri na aña 1976. Na aña 1979 SVGA a habri un pasadia pa adulto na Brasil mainta y atardi den e edificio di scol dun’un man. Desde aña 1982 tabatin un psicologo na SVGA, aña 1985 a cuminsa un sportleider y na aña 1986 nos trahado social, cu te actualidad ta den servicio cerca pa nos, a cuminsa na SVGA.
E grupo social pedagogico a forma y na aña 1993 a amplia cu un logopedista y dos aña despues cu un di dos psicologo. Desde aña 1985 e asina yama “di tres fase” a habri. Esey tabata encera cu Pasadia Bibito Pin a muda pa Piedra Plat 97A y na e mesun tereno a habri Pasadia Briyo di Solo pa adulto y Centro Man na Obra cu ta un centro pa train diferente trabao pa adulto.
A habri tambe un gymzaal riba e tereno pa por duna atencion na movecion pa e clientenan. Na aña 1988 a realisa Cas Sjabururi unda adultonan vulnerabel por a cuminsa biba y haya cuido necesario mientras den dia ta bishita Pasadia Briyo di Solo o Centro Man na Obra.
Na aña 2003 SVGA a habri dos apartamento riba e tereno di Cas Sjabururi pa habitantenan mas independiente cuminsa train pa biba riba nan mes. Hunto cu FCCA a logra na aña 2008 pa habri e oportunidad pa algun persona bay biba cu guia riba nan mes den e bario di Jaburibari.
Na aña 2019 a pasa e guia di e habitantenan over pa Fundacion Biba Bou Guia. Na aña 2020 Cas Blenchi a habri den cuadro di e “Sociaal Crisis Plan Aruba”. Esaki ta duna oportunidad pa brinda un cas pa muchanan y hoben cu temporalmente no por ta cerca nan mayornan. Hunto cu Stichting Ambiente Feliz a habri na aña 2021 un Pasadia pa mucha cu discapacidad multiple na Centro di Cuido na San Nicolas. Na e momento aki ta duna enseñansa, guia y/o cuido na mas o menos 250 cliente o alumno diariamente.
Algun reto di SVGA
Den transcurso di tempo SVGA a encontra algun reto sigur. Desde cu gobierno a cambia e forma di subsidia fundacionnan na 2017, sin cu a caba di rond af e bevorderingen di hopi trahado cu a wordo pidi prome cu e cambio, e presupuesto no ta yega pa duna e cantidad y calidad di cuido cu nos kier brinda nos clientenan.
Gobierno, te awe, no a tene cuenta cu e suma di subsidio cu tin inflacion tampoco. Esaki lamentablemente a resulta den un inkrimping den cuido desde januari 2024 y un caso den corte contra gobierno.
Pa cu clientenan ta mira cu no tin pasadia adecuado pa e adulto mayor cu un discapacidad intelectual na Aruba. Esey ta haci cu pa e famianan ta hopi pisa pa cuida nan familiar y e peso riba e casnan manera Cas Sjabrururi y Stichting Ambiente Feliz a bira mas.
Tin mester mas trahado den e casnan pa por cumpli cu e necesidad di e habitantenan, y e trahadonan mester di habilidad nobo pa deal cu e problemanan fisico y psikico cu ta bin cu edad halto.
Tin un lista di spera largo pa e Pasadia Bibito Pin pa mucha y no por a realisa ainda un scol pa voortgezet speciaal onderwijs (VSO) pa nan alumnonan mientras cu nan alumnonan tambe tin derecho pa sigui desaroyo den un ambiente escolar te cu nan 20 aña por lo menos.
