Caya di Rotonde Noord bay pariba a wordo honra na Felix Flanegien

Develo di borchi

ORANJESTAD (AAN): Recientemente den oranan di atardi, un ceremonia a ser teni net panort di rotonde di Noord, na momento cu Gobierno a honra dos ciudadano fayeci, cu develo di nomber di caya, pa tanto e caminda di Rotonde bay pariba direccion Kudawecha, y e caminda di Rotonde bay pabao direccion Palm Beach.

   E honor a bay pa Charro Kelly (d.f.m.), y tambe Felix Flanegien (d.f.m.)  Famianan di ambos politico tabata presente e atardi aki.

   Gobierno a honra e peticion pa cambio di nomber di caya, pa e dos personanan aki cu semper a traha na bienestar y progreso di Aruba.  Y awor merecidamente dos caya ta carga nan nomber.

   Prome Ministro demisionario Evelyn Wever-Croes a indica cu na diferente ocasion a drenta peticion pa honra tanto Pedro Pablo (Charro) Kelly, y Felix B. Flanegien cu un caya na Noord.  Sinembargo tabatin diferente proceso y burocracia cu a stroba na comienso, pero awor a yega pa ehecuta e peticion.

   Gobierno ultimo añanan a cambia e maneho di nombra cayanan na baluartenan, y esaki pa no haci e aspecto logistico mucho complica.  E caya ta keda mantene su nomber cu e tin oficialmente, pero esun cu ta bay pariba ta na honor di Felix Flanegien, y esun bay pabao rumbo Palm Beach ta na honor di Pedro ‘Charro’ Kelly.

   Tanto Charro y Felix ta personanan hopi conoci den comunidad.

   Prome cu Felix Basilio Flanegien a bira politico, a obtene su Master’s na Kweekschool na Nijmegen (Hulanda).  Ora di regresa Aruba, a traha como docente pa varios aña.  Entre 1972 y 1975 e tabata cabezante di Colegio Ora Ubao na Tanki Leendert.  E tabata hopi activo riba tereno social, y a ocupa funcionnan como President di e seccion di Aruba di Federacion Antiyano di Cuido Hubenil (1975 te 1981), y tambe miembro di Fondo Nacional pa Desaroyo Social (CEDE Aruba), tabata president di Fundacion Avond MAVO Opleidingen (1979 - 1981) y tabata fundador y president di e prome centro comunitario di Aruba, esta Centro di Bario Noord for di 1967 pa 1981.

   Felix Flanegien a dal su prome paso den Politica na 1975, den nomber di distrito di Noord el a aparece e tempo ey na number 25 di lista di MEP pa eleccion di Conseho Insular.  Despues di esey el a participa riba lista di MEP den diferente eleccion.  El a tuma un pausa den un periodo cu tabatin diferencia di opinion, pero despues a regresa den fila di MEP.

   Ademas di su miembrecia di Conseho Insular, el a wordo nombra tambe na 1981 como e di 6 diputado di Colegio Ehecutivo di Teritorio Insular di Aruba.  E tempo ey el a haya cartera di Enseñanza, Salubridad Publico, y di Informacion.  Na 1995, Felix Flanegien pa su meritonan a wordo condecora como Ridder in de Orde van Oranje Nassau.  Pa su meritonan awor a dedica e caya na su honor.