ORANJESTAD (AAN): Durante conferencia di prensa di Partido ReD, Ricardo Croes, Rudy Lampe y Rene Kock a anuncia nan retiro di politica.
Segun e politiconan, pueblo a papia palabra cla dia 6 di december ultimo. E gran mayoria a vota pa mantene e sistema di dos partido tradicional cu den pasado a keda acusa di un cantidad di caso di corupcion. Esaki kiermen u corupcion lo continua y ta aceptabel den nos pais? Ta un cuestion di mentalidad y nos ta obedece pueblo y pesey mes Ricardo Croes, Rudy Lampe y Rene Kock ta retira di politica.
Full e directiva di ReD tambe ta retira di nan funcion. Lo keda atende asuntonan pendiente, manera relato financiero na Conseho Electoral, te cu e miembronan di ReD yena e funcionnan di directiva.
Nan a splica cu den nan opinion, ReD tin razon en cuanto e necesidad di un lista combina. For di 2005 ReD a boga pa uni e partidonan no tradicional. ReD a invita Accion 21, MAS, Raiz y LPR pa forma un lista combina y tur a nenga y tur a keda pafo di parlamento. Si a acepta e union e resultado lo tabata otro. E ta keda un reto pa uni forza den un lista combina y asina logra cambia e sistema bipartidista tradicional.
Na final nan a gradici tur cu a firma y a vota pa nan lista.
