ORANJESTAD (AAN): Desde 8 di mei 2021, Stichting Reclassering en Jeugdbescherming a lansa un recaudacion pa por yega na suficiente fondo pa inverti den 60 laptop, pa 60 hoben den necesidad.
E organisacion a stipula un periodo di 60 dia pa yega na e suma of cantidad di material necesario, pues pa dia 7 di juli 2021.
Stichting Reclassering Aruba no ta solamente ehecuta e trabou di guia y reintegracion di clientenan hoben y adulto, pero tin como meta tambe pa yuda kibra e ciclo di criminalidad pa medio di
concientisacion y prevencion.
Educacion ta e miho prevencion contra pobreza y criminalidad. Estudionan ta mustra cu
studiantenan cu tin nan mesun tecnologia y material di scol, no solamente ta haya mihor punto na
scol, pero tambe ta crea un actitud mas positivo pa cu sinjamento, ta mehora nan comportacion en
general y nan imagen propio.
Den nan trabou diario, e trahadonan social di Stichting Reclassering Aruba a nota cu un grupo di
hoben particularmente vulnerabel ta esnan entre 11 - 13 aña di edad cu a net caba cu scol basico y
ta bay cuminsa scol secundario. E etapa aki den un hoben su bida ta trece hopi cambio,
responsabilidad y influencia externo. Un hoben cu tin e recursonan y sosten necesario pa enfoca
riba su educacion, tin menos chens di desvia riba mal caminda.
Pa e motibo aki e team di Stichting Reclassering en Jeugdbescherming a opta pa no celebra nan di
60 aniversario den forma festivo, sinembargo, a dicidi pa inverti e fondo di celebracion den un
causa cu ta beneficia e grupo specifico aki. Cu e pensamento; ‘Menos hoben den man di husticia, ta
nifica menos criminalidad y mas trankilidad riba nos isla’.
Lastimamente, faltando menos cu 1 siman pa yega na e fecha stipula, Stichting Reclassering en
Jeugdbescherming no a logra yega na e suma necesario ainda. E organisacion ta consciente di e
situacion economico actual y sigur kier gradici tur compania y persona cu a contribui te cu awor.
E fundacion ta determina pa logra e meta nan dilanti y ta urgi companianan pa considera e peticion aki. Donacion ta posibel den forma monetario of material.
