*Tambe lo reduci tarifa seguro di viahe - ORANJESTAD (AAN): Banda di e recuperacion den cantidad di turista, Oficina di Turismo di Aruba (ATA)
ta sigui traha riba diferente proyecto cu lo por representa un impulso adicional riba e proyeccionnan positivo cu tin na e momentonan aki.
REDUCCION TARIFA SEGURO DI VIAHE
E CEO di ATA, Ronella Croes a señala dos proyecto. Un di nan ta e reduccion di e tarifa di e seguro cu tur hende mester paga ora cu nan bishita Aruba. Esaki ta un topico cu ta wordo discuti y ta preparando pa anuncia pronto un reduccion di e tarifa aki di seguro mandatorio pa tur bishitante.
Ya caba ta un hecho cu lo reduci esaki, pero pronto lo anuncia cu mas detaye kico e tarifa nobo ta bay ta, a splica. Esaki sigur ta un otro stimulo.
MANEHO PA BISHITANTENAN CU TA VACUNA
E otro proyecto ta e parti di e maneho pan e bishitantenan cu ta completamente vacuna. Akinan ta papiando caba di minimalisa rekisitonan vigente pa e turistanan cu a vacuna completamente contra Covid-19.
E cambio aki tambe lo wordo anuncia pronto, pero ta algo cu ta trahando riba dje. Tin cu finalisa e detayenan pa asina anuncia, sigur pa e mercado mericano, kico lo ta e rekisitonan nobo relaciona cu e parti di PCR test cu no lo ta vigente pa nan mas y con Aruba lo zorg pa verifica locual e bishitantenan ta entrega ta valido tambe, e ehecutivo di ATA a duna di conoce.
Esaki no solamente pa Aruba, pero globalmente ta e punto di atencion aworaki, a indica.
OTRO MERCADONAN
Tur dos aspecto lo representa un otro impulso pa e mercado turistico pero banda di esaki ta sigui pone atencion na e otro mercadonan manera esun europeo, unda ta proyecta cu lo cera aña ariba di e proyeccion optimista cu tin pa e mercado aki.
E mercado latinoamericano ta sigui ta den e parti conservativo. Akinan ta mira mas reto, entre otro mara tambe na e maneho di e virus y tambe diferente desaroyo rond di e virus mes, Croes a declara.
