Stichting Hunto ta sigui traha duro riba e problema di adictonan den comunidad

ORANJESTAD (AAN): Recientemente DIARIO a entrevista Dalgis o Montalvo di Stichting Hunto, cu ta purbando di yuda e adictonan cu ta biba riba caya, pa mehora nan bida.

El a splica cu for di aña pasa caba a introduci bek e asina yama ‘Bemoeizorgteam’.

“E idea di e team aki ta pa por tackle e problema di adictonan activo riba caya”.

E intencion ta pa bo busca y trece nan na e inloophuis na Meiveld y eynan nan por baña y come y sali bek limpi, segun Montalvo.

El a sigui bisa cu esaki ta un proyecto cu no a start completo, pero cu tin un aumento si den e cantidad di cliente cu ta bay na Stichting Hunto.

“Actualmente nos tin un average di 18 pa 25 cliente cu ta bin cerca nos tur dia y ta ricibi guia riba con pa papia cu hende y con pa sinta na mes ora di come etc.”.

Nos ta purba di inculca norma y balor bek cerca nan y pesey bo tin mester di transporte y un bon team cu sa e trabao y tin afinidad pa traha cu e clientenan aki, segun Montalvo, kende a indica cu e ministerio encarga a yuda, pero ainda falta.

El a splica cu un problema cu tin te ainda ta cu tin varios adicto cu no kier bay cerca e fundacion y cu ta djis prefera di laba auto etc. y no yega na e centro.

“No kier yuda, pero mester wak te con leu e persona kier wordo yuda”.

Pa nos e ta keda un reto, specialmente si bo no tin tur medio pa tackle e problema, segun Montalvo, kende a indica cu ta purbando di wak con por yuda nos hobennan riba e parti di adiccion, unda cu ta mustra kico ta e consecuencianan fisico entre otro di consumi droga.

“Nos ta purbando di ta mas riba caya y mas cerca di hende y no warda te ora cu e mayornan mester trece e muchanan cerca nos”.

Nos mes por ta eyfo y bay scolnan, pa duna e informacion valioso, segun Montalvo.

Esaki ta hopi importante pasobra e mas y mas ta nota personanan mas hoben cu ta cay den adiccion problematico.