Parlamentario Guedez-Erasmus a dirigi diferente pregunta na Minister Tjon:
ORANJESTAD (AAN): Actualmente ta den e di 16 dianan di e campaña di activismo contra violencia di hende muhe y mucha muhe. E campaña aki a inicia dia 25 di november dilanti di Bestuurskantoor.
Parlamentario di Fraccion di MEP, Darlaine Gomez-Erasmus tabata presente na e ceremonia di cendemento di luz oranje di e edificio di gobierno como muestra di sosten na e iniciativa aki caminda el a ricibi un documento cu puntonan di recomendacion pa loke ta trata eliminacion di violencia contra hende muhe.
Guedez-Erasmus a sigui bisa "mi a tuma e puntonan aki na serio y mi a entrega e documento aki na Presidente di Parlamento, pa asina tur e otro parlamentarionan por a hay'e y ta na altura di e importancia di e puntonan di recomendacion aki ta encera". E parlamentario tambe a formula diferente pregunta pa Minister di Asuntonan Social y Husticia riba cual e kier haya contesta riba nan pa asina haya sa kico tur por worde haci y duna na cada un su prioridad.
E preguntanan ta referi na data cu tin tocante e shelter, e parti di violencia domestico na Aruba y tambe violencia riba otro areanan. Tambe a puntra Minister Rocco Tjon su opinion riba entre otro Codigo di Proteccion, violencia familiar y e plannan pa aña 2024-2025, Guedez-Erasmus a indica.
El a manda su preguntanan di biaha pasobra ta importante pa traha hunto, Parlamento y Gobierno di Aruba pa asina ta riba un liña y 'tackle' e problema aki den comunidad, di violencia contra hende muhe y mucha muhe. Esaki di e parti di ley y maneho. Pero tambe organizacionnan cu ta e wowo pa mira kico ta pasa den comunidad y tambe e pueblo di Aruba en general cu ta coopera y ta atento.
Darlaine Guedez-Erasmus su deseo ta pa haya e contestanan den un periodo corto pa asina bay over tambe pa yama un reunion di comision, cual e ta presidi, cu e 5 organizacionnan cu a entrega e documento dia 25 di november pa asina nan duna un splicacion mas amplio riba cada recomendacion den e documento cu nan a entrega na su persona y cu el a comparti cu Parlamento di Aruba.
El a haci un peticion na comunidad pa sigui sostene e campaña aki ya cu esey lo yuda conscientisa e pueblo cu no por permiti violencia ni cerca hende muhe ni hende muhe.
