Parlamentario Shailiny Tromp-Lee:
ORANJESTAD (AAN): Diahuebs, 15 di februari 2024, mi a asisti na apertura di e edificio nobo di Stichting Hunto. Sigur durante e anochi aki a keda accentua cu e logro aki ta uno masha significativo den lus di e meta principal pa haci cuido di salud mental accesibel, inclusivo y efectivo aki na Aruba.
`Desde 2017 cu mi a drenta Parlamento nos a bin ta duna problematicanan manera abuso di mucha, salud mental y e crisis social nacional nan debido atencion. Despues di a sinta cu stakeholders mas y mas bo ta realisa cu nos no por a warda mas y mester duna salud mental su debido atencion y trate como prioridad. Ya prome cu e pandemia a cuminsa traha riba e problematica aki. Lastimamente e pandemia a tranca e proceso, pero asina mes a sigui traha.
Banda cu salud mental ta haya e atencion necesario, inversionnan importante a keda haci cu e meta primordial pa cu tratamentonan ta wordo duna mesora na adulto y mucha, y cu e lista di espera ta bira menos.
E apertura di e edificio di Stichting HUNTO no solamente ta simbolisa e integracion fisico di locual ta psikiatria y tratamento di adiccion bou di un solo dak, pero tambe ta muestra di compromiso colectivo pa kibra e bareranan existente pa cu esakinan.
Durante di e charlanan nos por a scucha e trayecto largo y dificil cu a keda encamina pa logra crea Stichting HUNTO, logra traha riba e plan y eheccion di e edificio nobo y renobacion di Centro Colorado.Tur e logronan te cu awor a ser logra door di a uni forsa y traha hunto. Pesey mi kier gradici Gabinete Wever Croes I y II pa nan esfuerso pa pone e ser humano central. Tambe na Stichting Hunto den su totalidad cu a traha incansablemente pa yega te unda nan ta awe. Cu un solo meta: brinda yudansa, guia y sosten na esnan cu ta busca ayudo y yudanan tin e resiliencia necesario pa supera e desafionan di salud mental of di adiccion.
Durante e actividad di apertura tabatin presentacion di e artista Levi Silvanie cu a comparti su testimonio cu e publico presente. Un testimonio di su lucha cu salud mental y tambe di su yiu muher. Pero con e mediante su arte awor ta brinda speransa y perspectiva na esnan cu ta lucha cu nan salud mental. Sigur su palabranan tabata impactante. Pesey mes, laga cada un di nos sea mas alerta, sea mas involucra. Brinda yudansa y sosten na esnan nos rond y cu ta luchando cu nan salud mental. Informa bo mes unda y con por brinda ayudo y sea e sosten of guia cu nan tin mester.
