Ronella Croes, CEO di ATA ta reitera:
ORANJESTAD (AAN) – Den entrevista cu DIARIO, Ronella Croes, CEO di Aruba Tourism Authority, a splica den entrevista cu DIARIO, cu netamente e tipo di estudio, cifranan y analisis cu ATA ta haci, ta yuda nan tuma e miho decisionnan cu nan mester, encuanto e reto cu tin na Aruba pa haya hende pa traha den e sector Horeca.
Ronella Croes a bisa cu den paisnan cu tambe tin e reto aki, manera Spaña, Italia, y tambe Venecia, entre otro, ta purba diferente forma pero no tur ora ta haya e resultadonan desea, pero Aruba ta sigui ta un destinacion sumamente popular.
El a subraya cu nos ta den un aña cu ta cuminzando hopi fuerte y tambe e resultadonan pa Januari ta hopi fuerte. “Nos meta y maneho pa e aña aki ta sigui ta pa haya mas di e impacto economico, pues mas entrada pa Pais Aruba, pa esey crece mas rapido cu e volumen ta crece. Dus, cada hende cu bin mester laga mas atras. Esey ta sigui ta e estrategia y e liña cora di e maneho y e lo sigui ta tambe”, Ronella Croes a relata.
El a reitera cu pesey ATA ta hopi den dialogo cu EPB y Colegio EPI. “Den pasado ya caba, ATA a haci un inversion hopi grandi den e aspecto culinario, por ehemplo, y aki nos por papia di ekiponan cu a wordo cumpra, mehoracion di e parti di IT, computer y diferente material anto, esey ta un proyecto cu nos ta evaluando atrobe. Fuera di loke sector priva ta haci pa yuda cu ne, kico nos tambe por haci pa yuda cu esey”, CEO di ATA a indica.
“E parti di educacion ta keda un prioridad pa ATA, y tin ya caba diferente punto cu scol mester trece dilanti, cu ta posible mehoracion den e sistema escolar cu por sirbi locual nos mester mihor, anto esey ta keda e enfoke” Ronella Croes a señala.
