Randall van Trigt, director financiero Hunto a splica:
ORANJESTAD (AAN) Señor Randall van Trigt, Director Financiero di Stichting Hunto, a señala den entrevista cu DIARIO, cu e Institucion aki a asumi bastante responsabilidad.
Si wak bon di unda nan ta bin, el a bisa, na aña 2019 hende tabata conoce, solamente, Centro Colorado. Awendia, realmente Stichting Hunto a crea un structura di cuater pilar.
Na Dakota antes tabata tin entre 800 pa 900 cliente pa aña, awor e ta rond di 1.500 cliente. Centro Colorado cu antes por a carga solamente 10 12 cliente, awo por wanta 48 cliente. Cinco aña pasa tabata tin un payroll di 8 trahador, awo tin 64 empleado. “Dus, ora bo wak tur e cosnan aki bo ta ripara cu nos a crece hopi. Fastioso ta cu nos cu ta traha akiden, por wak e progreso, pero berdad hopi biaha e pueblo eyfo no ta mira e progreso, pasobra hopi biaha nan ta wak un problematica chikito manera adiccion di caya, pero si bo wak cuanto pashent, cliente, nos ta yudando, ta di 1.500 pa 2.000 cliente pa aña, inclusive adiccion y salud mental.
Pues, nos a crece hopi grandi, vooral e ultimo dos añanan”, van Trigt a señala. E prome tres añanan a tuma hopi di nan. “Hunto a drecha e parti interno, upgrade e personal, busca personal nobo, drecha nos infrastructura, y e ultimo dos añanan nos a cuminza cambia e programanan pa deal cu salud mental y cu adiccion”, Randall van Trigt a subraya.
E reto den tur esaki ta fondo. Hopi hende ta pensa cu Hunto tin extra fondo. “Mi ta bay ta honesto, e ultimo cinco añanan y, esey nos a hinca den nos plan cu nos a traha na 2022 pa 2025, nos ta mantene nos mes na esey. E plan ta papia di fondonan cu nos a sinta cu gobierno, y nos a mustra gobierno unda su fondonan ta wordo uza: Adiccion y Salud Mental, y nos a brinda nan un vision na unda cu e mesun fondonan nos por logra hopi mas.
“ Pues, hopi hende ta kere cu nos a crece den fondo, cu ta costa gobierno mas, pero mi ta honesto, e t’un budget neutral”, van Trigt a remarca. El a comenta con nan a mustra gobierno cu nan por a rindi e fondonan cu nan a cumpli, a haci hopi mas, duna miho servicio.
Pa loke ta aña 2025, van Trigt a bisa cu un di e proyectonan cu nan tabata tin den plan ta takel e problematica di adiccion riba caya. “Nos tin un aña caba ta preparando esey, nos ta den palabracionnan cu fundacionnan internacional”, el a splica. Esaki pasobra tin un grupo grandi di adicto riba caya cu no ta confia e sistema y no por culpa nan. Den 70 aña, 100 aña mescos, no tabata tin maneho di adiccion.
