Parlamentario Wever-Croes kier sa di gobierno kico ta pasando riba e tereno aki:
ORANJESTAD (AAN) Parlamentario di fraccion di MEP, mr. Evelyn Wever-Croes, den entrevista cu DIARIO a referi na su reciente encuentro cu Secretario di Estado di Hulanda, unda a papia tocante e fianza cu Hulanda a haci na gobierno di Aruba, durante e temporada di Covid-19. El a reuni cu ne hunto cu lidernan di fraccion y presidente di Parlamento, y mas atardi e tabata tin encuentro cu e funcionario Hulandes.
Parlamentario Wever-Croes a menciona cu el a negocia cu gobierno di Hulanda te cu dos siman pasa, y e conoce unda e posicion di Hulanda ta, y ta compronde pa e Parlamentarionan nobo, cu ta prome biaha cu nan a reuni cu e Secretario di Estado, y a purba di “cambia e cos” pero Hulanda no ta traha asina.
“Ora Hulanda ta bay den un direccion eynan bo ta bay. Loke bo ta purba ta pa den e rumbo cu bo ta bay cu Hulanda, pa bo yega e miho palabracionnan p’ Aruba. Dia 1 di Mei ta dentro di tres siman, y p’esey nos fraccion, ayera mesora di e reunion cu e Secretario di Estado, a manda un carta pa gobierno, pa gobierno bin duna nos informacion tocante kico a pasa e ultimo dos simannan. Mi sa kico a pasa te dia cu mi tabata Minister Presidente, pero kico a pasa despues, mi no sa. Aworaki, cu ta faltando asina poco dia, cada dia ta conta y cada dia cosnan nobo por pasa. Mi ta spera cu gobierno por bin pronto y splica nos kico ta pasando riba e tereno aki”, Parlamentario Wever-Croes a relata.
Wever-Croes a splica cu e palabracion ta cu dia 1 di Mei e Ley mester ta entrega na e Parlamentonan, pero esey no ta bay wordo logra.
“Mi ta papiando awo di e palabracion cu mi a haci tempo cu mi ta Minister Presidente ainda, durante mi biahe pa Hulanda na Februari nos lo percura pa prome cu e dia di pago, Aruba tin cu paga na October, tin cu zorg pa tur cos ta cla, y e ora ey por yega na un palabracion kico ta pasa cu e interes, desde 1 di Mei. Hulanda hopi duidelijk, no kier cambia e fecha di 1 di Mei”, Parlamentario Wever Croes a subraya.
El a expresa cu asina Hulanda ta traha. E ta pone fecha sea cu e ta realistico of no, tur hende mester purba di cumpli cu ne.
“E no ta fin di mundo! Nada ta fin di mundo! Pasobra di kico ta loke nos ta papiando? Nos ta papiando di un fianza di 916 miyon florin, cu nos a presta di Hulanda durante temporada di Covid-19. Tin un palabracion caba con nos ta paga esey bek. Tin cu pag’e den 20 aña: mester a cuminza paga na aña 2023. E prome pago nos a haci’e caba na October 2024. Un biaha pa aña bo ta pag’e, na October. Esey ta e palabracion y unico cos cu ainda ta habri, ta e interes” Parlamentario Wever-Croes di Fraccion di MEP, a reitera.
