Parlamentario Wever-Croes fraccion MEP:
ORANJESTAD (AAN) Den entrevista cu DIARIO, tocante e tema di e fianza cu gobierno anterior a haci for di Gobierno di Hulanda, durante e temporada di Covid-19, pa un suma di 916 miyon florin, y mester paga den un transcurso di 20 aña, cuminzando na 2023, ex-Minister Presidente Evelyn Wever-Croes a sigui splica cu e acuerdo ta bisa cu e interes ta 6.9%.
“Despues cu nos a yega na e acuerdo ey, nos a sigui negocia cu Hulanda, y loke ami a laga atras pa e gobierno nobo ta un ‘menu’ cu dos opcion. Sea bo ta paga 6.9% y bo ta sigui manera e ta awo, of si bo kier baha interes na 3.4%, pero bo tin cu bay di acuerdo cu ley di Reino. Kiermen, e gobierno nobo y Parlamento su constelacion nobo, mester dicidi, ora cu e negociacion ta cla, si ta bay pa menu 1 of ta bay pa menu 2”, Parlamentario Wever-Croes a señala.
El a reitera cu no ta fin di mundo, por paga na 6.9% awo, pero enberdad si por paga 3.4% tin mas placa cu por inverti den comunidad.
“Tempo cu mi a negocia pa nos yega na menu 2, interes na 3.4%, principalmente partido AVP tabata asina contra e Rijkswet e tempo ey, mi a drenta Parlamento pa papia di e tema, mi a haya AVP ta ataca mi, cu mi a entrega autonomia, loke ta señora Gerlein Croes y señora Mervin Wyatt-Ras a ataca mi constantemente, y e parlamentarionan di AVP.
“Pues, ora cu nos tabata negociando pa yega na algo bon pa Aruba, no tabata tin’e. Awor tur cos a cambia, por weita con oposicion ta wordo hiba na full otro manera, unda cu nos a duna nos aspectonan y contribucion constructivo na solucion, y esey nos ta bisa Gobierno, bin informa Parlamento. Bo no por keda keto mas, apenas tin dos siman cu Gobierno a huramenta, pero tin cosnan urgente, negociacionnan cu ta sigui andando, y ta importante pa informa Parlamento kico ta e ultimo posicion, pero Parlamento tin cu fiha un posicion!” Parlamentario Evelyn Wever-Croes a remarca.
