Elton Semeleer di Stichting Casa Cuna ta splica:
ORANJESTAD (AAN): Presidente di e bestuur di Stichting Casa Cuna, Elton Semeleer, a presenta na comunidad di Aruba Stichting Fier. El a splica kico e stichting aki ta nifica pa Casa Cuna.
Semeleer a duna di conoce cu nan a conoce Linda Tepstra di Stichting Fier di Hulanda for di 2016. Nan ta duna sosten na Casa Cuna, na a profesionalnan pa loke ta trata cuido di e muchanan y e 'tienermoedernan".
A cuminsa cu un proyecto di duna cuido y guia na mamanan hoben den comunidad. Esaki ta un trayecto cu a cuminsa desde 2016 y cu ta andando ainda aworaki.
Segun Semeleer, semper tin retonan cu mester atende cu nan. For di comunidad ta ricibi señalnan cu mester keda activo y adapta na e necesidadnan nobo cu e grupo vulnerabel aki tin mester y esey ta loke ta haciendo tambe, a remarca.
Sra. Trepstra ta haci su trabao den forma boluntario. Tur aña ta purba di trec'e Aruba, contando cu e apoyo di comunidad y algun comerciante pa haci esaki posibel.
El a agrega banda di esaki cu e cuido pa e mamanan hoben a wordo adapta. E programa cu tin ta pa atende cu e problemanan cu tin door di introduci un programa den dia caminda diferente actividad ta wordo organisa pa e mamanan hoben y nan famia por haya guia.
Tur esaki ta wordo haci conhuntamente cu partnetnan cu tin den vel, manera Wit Gele Kruis, pero tambe ta hacie bao di un guia special cu Linda su organisacion ta brinda.
