ORANJESTAD (AAN) – Chibi van der Hans a bishita redaccion di DIARIO pa haci entrega di su obra “LAB Volume One” cu ta consisti dos maraviyoso buki,
cu ta contene historia di Aruba su carnaval, na nos coordinador di redaccion Aureen Werleman.
Chibi, logicamente no mester di presentacion, henter pueblo di Aruba conoce, como cu for di chikito e ta envolvi den nos carnaval. E ta propietario y director di “New Studio Mileneo 3” y el a cuminza compila informacion di Aruba su Carnaval desde 11 di November 1998, atravez di su revista Bacchanal.
A tuma Van der Hans hopi aña pa compila y set up tur informacion den otro hunto cu un cantidad grandi di potret di cual hopi ta inedito. Den e transcurso di otro siman, DIARIO lo trece dilanti un resumen di tur locual Chibi ta conta di su mes experiencia carnaval, su estudio, con el a yega na tur e informacion capta den su “LAB Volume One” cu ta haci di su obra skirbi un literatura unico.
Riba potret por aprecia a autor Chibi van der Hans hunto cu señora Aureen Werleman, na momento di a haci entrega di “LAB Volume One” den un hopi bunita presentacion.
