ORANJESTAD (AAN) – Directora di Departamento di Agricultura Cria y Pesca (LVV), a referi den entrevista cu DIARIO
na e grupo di hobennan cu e aña aki, ta bay busca afo nan estudio profesional, y e ta desea pa nan wordo motiva tambe, pa prepara nan mes riba tereno di agricultura. Santa Rosa mester di mas hende cu experticia den e ramo aki.
Natalie Maduro ta haya cu ta importante pa e aña aki tambe, cuminza duna e studiantenan aki un estimulo pa nan compronde cu Aruba mester di nan conocemento local, y expertonan local, pa nos Isla no sigui depende riba companianan of consultancy di afo, cu hopi biaha no ta barata. Nan ta bin, ta haci un assessment, nan ta bay y hopi biaha e conocemento ta bay cu nan.
“Esey ta un deseo di Santa Rosa tambe pa wak. Manera nos ta bisa tin añanan caba cu nos ta stimula nos studiantenan pa nan mes lanta nan negoshi, pa tin mas productonan agrario cu uso di tecnologia. Mi tin entendi cu durante Aruba Dag tabata tin, boetnan caminda cu a combersa cu studiantenan.
Santa Rosa no tabata parti di esey, pero mi tabata tin un combersacion cu señora Joselyn Croes, durante mi bishita na Hulanda, y nos a papia tambe pa wak con nos por sondea ken ta studiantenan local den e ramo aki, y con hopi nan por bin bek. Pasobra, nos sinceramente mester di nan sosten, nan conocemento, pa nos hiba dilanti no solamente agricultura pero tambe full e sector”, Natalie Maduro a indica.
