Stichting BOB a cambia e manera con cancer di pecho ta wordo atendi na Aruba

Saminacion propio ta keda hopi importante - *A bay di un maneho curativo pa uno preventivo

ORANJESTAD (AAN):  Detecta na tempo iregularidad den e pecho di hende muhernan sano entre 45 pa 75 aña di edad, y cu por mustra riba cancer di pecho ta e meta di Stichting BOB (Stichting Bevolkingsondezoek Borstkanker).

Door di esaki ta aumenta e chens di biba mas largo cu cancer na pecho door di tratamento cu ta menos agresivo y menos intensivo.

'Screening' di pecho ta un programa structura caminda e poblacion, cu no tin keho, ta wordo controla riba cancer na pecho, pa medio di un mamogram.

Mundialmente, cancer na pecho ta e cancer mas diagnostica cerca hende muher. Segun e cifranan, Aruba no ta diferencia hopi for di e resto di mundo.

Diantha Nüesch, encarga cu PR & Marketing na Stichting BOB a splica den entrevista cu DIARIO pakico un hende muher cu ta yega na edad di 45 aña ta bin na remarca pa participa den e sondeo di pueblo den forma gratis y boluntario. 

Pakico 45 aña?

E sondeo ta pa hende muher entre 45 y 75 aña di edad. E cifranan ta mustra cu mayoria di hende muher cu ta haya cancer di pecho ta den e edad aki. Tin dos piek grandi rond di 50 y rond di 60 aña.

Pa por tin mas control riba e grupo den risico, ta haci e 'screening' di pecho den hende muher entre 45 y 75 aña. Kiermen, 10 aña prome y 10 aña despues pa asina por haya full e grupo, a bisa.

Esey no kiermen cu si un hende muher ta mas jong e no por haya cancer na pecho. Por sosode y tin casonan na Aruba tambe, pero e grupo di edad unda e casonan ta presenta mas frecuentemente ta 45 te cu 75 aña. Pesey e sondeo di pueblo ta e edad caminda tin hopi caso di cancer di pecho, Nüesch a indica. 

Saminacion propio tambe ta importante

Saminacion propio ta keda hopi importante. Tin cancer cu por desaroya na un manera mas agresivo cu normal. Pesey ta importante pa bo conoce bon bo curpa. Pero tambe ta importante pa esnan mas jong cu no por participa ainda den e sondeo, Nüesch a splica. 

Seis aña realisando 'screening'

Stichting BOB actualmente ta conta cu un mashin pa haci e mamogramnan. Nan a wordo funda na 2012 y despues di un proceso di 'setup' y di a haya e donacion di e mashin, na aña 2016 a inicia cu e invitacion na e grupo meta pa haci e 'screening' di pecho.

Aworaki e fundacion ta den e di tres ronde cu e hende muhernan cu por a participa ora cu a cuminsa haci e prome screeningnan, 6 aña pasa. 

Di un maneho curativo pa uno preventivo

Prome cu Stichting BOB, e manera cu tabata trata e casonan di cancer di pecho tabata uno curativo. E persona tabata wordo trata ora cu a haya sa cu e tin cancer di pecho.

Awendia door di e posibilidad di por haci un 'screening' of sondeo ta trahando den un forma preventivo. Esaki ta haci sigur un diferencia basta grandi pa loke ta e problematica aki di cancer di pecho na Aruba.

Antes hopi hende tabata muri sin cu por a atende e malesa den un fase inicial of riba un maneho preventivo. "No tabata tin ningun idea asina aki y aworaki cu Stichting BOB ta traha den forma preventivo. AZV a wak e beneficionan tambe pa e poblacion y como un zorgverzekering bo ta wak e beneficionan financiero tambe si e casonan aki ta wordo detecta na tempo.

Tratamentonan ta bira hopi mas chikito, hopi menos invasivo, bo por salba e pecho, bo por salba e persona. Prome no tabata tin un programa preventivo. Echt hopi hende tabata fayece, pasa den tratamentonan hopi pisa te dia cu un grupo di hende a realisa y a bringa pa cambia esaki", Diantha Nüesch a indica.