Un compania cu mester di monopolio pa existi, no tin forsa propio - *E momento a yega pa un contenido nobo pa Compania di Estado - *Gobierno ta dicidi riba monopolio y no por tin negoshi cu monopolio
ORANJESTAD(AAN)—Awe atrobe monopolio di un compania di Gobierno ta na discusion. Los di e nombernan envolvi den e caso aki, nos mester yega na un conclusion si introduccion di Companianan di Estado a favorece Aruba of si e matrimonio entre e concepto empresarial y gobernacion, ta dificil na un pais democratico.
Segun e concepto logico di democracia y mercado liber, Gobierno ta percura pa e base structural ta presente di acuerdo cu un pais cu ta regla tur su asuntonan na forma legal.
Negoshi, companianan cu ta basa riba inversion y resultado financiero, no por ta di Gobierno pero mester ta priva.
Aki e rabo di e porco ta krul. Gobierno a bira empresario. Servicionan y Departamentonan di Gobierno a bira Compania di Gobierno supuestamente pa Gobierno no mete den e produccionnan esencial di un pais, den cual Gobierno ta dicidi.
Pa un compania funciona, e mester di placa. Esaki ta hustamente e trabou di empresa priva, cu ta basa riba e hecho cu empresarionan ta pone placa pa un negoshi y ta percura pa e negoshi prospera pasobra esaki ta nan entrada cu ta pone nan pan riba mesa.
Pa un empresa por ta bon, e mester inverti y e mester competi cu otro. E prijs mester ta bon. E producto mester ta bon.
Empresa priva ta basa riba competencia, loke ta na interes di e Pueblo, cu por cumpra na varios otro caminda.
Competencia den mundo di negoshi ta basa riba prijs enfrente calidad, eficiencia.
Un empresa priva mester tin un producto cu por competi riba mercado, caminda Gobierno mester percura pa Leynan cu ta evita por ehempel black market of benta di producto horta.
Segun democracia, Gobierno tin su papel, Comercio tin su papel.
Si Gobierno kier entrega producto of servicio, e no por abusa su posicion di Gobierno cu sigur ta base di monopolio cu solamente Gobierno por duna y ta mara man di comercio liber.
Si un negoshi priva bay malo, e comerciante mester cera su porta. Si un negoshi di Gobierno bay malo, e gobernantenan ta keda gobernante y Pueblo mester biba cu tur e resultadonan.
E base di sistema democratico na un pais cu un mercado liber, no socialista, a wordo kibra cu introduccion di Companian di Gobierno, cu pa nan por existi y sigui existi, mester di monopolio.
E elemento di proteccion y defensa di comunidad, central den democracia, a bay perdi pero na mes momento ta stroba competencia di mehora e servicio cu pueblo mester haya.
Democracia no por sostene monopolio? Realmente no! Pasobra monopolio ta haci cu un persona ta obliga di haci uzo di un compania aunke su producto ta inferior.
Monopolio ta bay directamente contra democracia.
Awor pakico monopolio ta haya sosten? Pasobra e wega di dictadura ta wordo aplica. Wowo di Pueblo ta wordo tapa pa realidad y berdad.
Un negoshi cu bon producto, un negoshi cu ta honra democracia cu ta exigi interes di Pueblo, no mester di monopolio cu ta proteccion di gobernacion y politica.
Na momento cu papia di monopolio, ta papia di e hecho cu politiconan ta haya un poder pa exigi Pueblo haci uzo di loke nan ta proteha, loke ta contra democracia y ta socialismo, dictadura!
Na mes momento ta stroba Pueblo haya e calidad cu e por haya di parti di un empresa priva, cu mester dedica su mes na mantencion di un producto, si e kier sigui existi como empresa.
En resumen, democracia no ta permiti monopolio di compania di gobierno!
