For di 11 di juli 2014 Aruba a perde su autonomia financiero --- *Reino a tarda pa atende e fli cu a destrui Status Aparte di Aruba --- *Serie di catastrofe mundial a afecta Aruba cu a wordo destrui na 2009
ORANJESTAD(AAN)—Awe Aruba ta confronta un situacion sumamente serio, causante di turbulencia politico na momento cu e pais mester enfrenta un serie di catastrofe mundial cu paisnan mas grandi y mas poderoso na mundo tin problema pa enfrenta.
Ta den circumstancianan sumamente serio na nivel mundial, actualmente Aruba mester reconoce e peliger di loke kier pretende di ta democracia, pero ta enemigo mas grandi di democracia, cu no ta tolera pa berdad wordo masacra.
Awe Aruba ta den un problema sumamente serio y Aruba cu a lucha pa su Status Aparte cu alma y curpa, no ta capaz pa lanta para pa defende su mes, debi na weganan cu hustamente e sistema democratico cu ta depende di politica, ta permiti.
CAFT y Gobierno di Aruba tin problema pa haya otro den un situacion, cu mester categorisa como un potpourri di instancianan y situacionnan cu a reemplasa e concepto democratico despues cu na 2010, e concepto democratico a muri na Aruba.
Na 2010 Hulanda no a lanta para na momento cu funcionamento democratico di Aruba, a wordo asesina.
E base di relacionnan den Reino a wordo kibra na 2010 ora Reino a permiti Gobierno Mike Eman di kibra e concepto di autonomia den Reino, cu ta exigi pa paisnan den Reino por para riba nan pia cu propio forsa, aunke nan ta dispuesto na yuda otro.
Na 2010, Hulanda a permiti Gobierno Mike Eman destrui e base financiero di Aruba, na momento cu a deshaci di mitar BBO, cu ta algo hamas bisto na cualkier pais cu ta papia di un gobernacion democratico y autonomo.
For di momento cu Mike Eman a forma Gobierno cu mitar BBO como asesino di futuro financiero di Aruba, Hulanda mester a interveni y Hulanda no mester a spera 2014 marca desastre financiero total di Aruba a base di manipulacion politico cu a tuma lugar cu Aruba.
Awe Aruba ta canta “Happy Birthday” pa e momento cu Aruba a perde su autonomia financiero ora 11 di juli 2014, aanwijzing a wordo duna y Gouverneur di Aruba a keda encarga cu e responsabilidad grandi pa evita cu Aruba ta zink!
Den un crisis mundial, awe wega politico ta kere cu Aruba a keda ciego for di e momento cu a manipula Aruba politicamente pa Gobierno Mike Eman por a haci su entrada y destrui situacion financiero di Aruba sin piedad.
Ora tabata laat Hulanda a actua y a baha Mike Eman for di Fort Zoutman, pero no por a scapa Aruba di e desastre cu a resulta pio ora prome un pandemia y awe un guera mundial ta ataca mundo, ta ataca Aruba cu sigur no tin lugar mas pa wega politico.
Awe nos ta canta “Happy Birthday” yeganda e fecha cu na 2014, porfin Reino a bisa Mike Eman cu ta basta y Aruba a wordo destrui pa e abuso politico cu a tuma lugar na man di Gobierno Mike Eman.
Con Aruba mester sigui y kico mester pasa?
Prome exigencia ta pa evita cu manipulacion politico bolbe logra herida Aruba mortalmente.
Aruba mester realisa cu ta henter mundo ta wordo afecta e resultado di Covid-19 y awor e Crisis Ukraine, cu Aruba no por remedia.
Aruba no por cambia e situacion mundial pero si Aruba por uni como Pueblo cu tabata ehemplar pa mundo den su afan patriotico.
Awe Arubianismo ta e arma mas grandi di Aruba, cu na prome lugar mester pidi Reino defini con ta atende cu CaFT, con ta atende cu tur tipo nobo di compromiso cu Reino den cuadro di acuerdonan pa por a confronta e situacion cu Gobierno Mike Eman a laga atras na 2017 di incertidumbre total riba tereno economico, financiero, social.
Cifranan ta papia un palabra cla y tur instancia na Aruba por bay den nan propio seno pa recorda 2017 di un Aruba den un calamidad financiero, sin presupuesto, na man di aventura malogra di Citgo, cu debe nacional cu awe mester paga orguyosamento pa no papia mes di e cariñito di PPS.
Na 2020, un Aruba cu a haci esfuerso pa subi un caminda nobo, mester a deshaci di su economia. Na 2022 ora recuperacion mester a cuminsa, un guero cu por considera mundial, ta mishi cu pan di tur hende na mundo.
Aruba mester sigui cana. Dialogo interno mester ta forsa di Aruba pa por atende cu Reino y yega na acuerdonan pa soluciona e herencia di pasado pero tambe pa por enfrenta un realidad actual mundial serio, cu ainda no a conoce su pio momento.
