Tres preso cu plan riba Diadomingo --- *Dos di nan a wordo gara na tempo riba tereno di prison --- E otro a logra sconde den e mini-mondi di matanan di druif
ORANJESTAD (AAN): Un situacion urgente a presenta su mes Diadomingo merdia, cu den un frega di wowo a mobiliza cantidad di patruya di Polis rumbo pa area di Prison di KIA.
Unidadnan di Polis di San Nicolas, hunto cu Recherche, y varios otro distrito mas, incluyendo unidad K-9, a mobiliza pasobra e informe a drenta cu 3 preso a ehecuta un plan pa huy di e Instituto Coreccional, y cu finalmente 1 preso so a logra bula e muraya y desaparece.
E acto aki a socede den e area di Prison di KIA unda ta cera e presonan cu a haya castigo di termino mas largo. Pa puro casualidad, un cuidador di preso tabata pasando den e area unda tin e pasiyo di emergencia den caso di candela. Aki el a bin nota cu tin 3 preso pafo di nan cel, ta buscando forma pa core yega na e muraya.
E cuidador di preso aki inmediatamente a bati alarma, y mesora un monton di cuidador di preso a yega. Nan a logra di gara y wanta duro dos di nan.
Nan a gara e preso Canades conoci como ‘Michael Gibson’, kende ta deteni pa asesinato di e persona asiatico na un compleho di Apartamento na Jaburibari.
E otro preso cu nan a gara tabata Jose Ventura, kende tabata envolvi den caso di atraco violento.
Sinembargo e di tercer preso, a usa un palet cu di antemano nan a leun na e muraya, pa asina el a haci un salto estilo atleta Olympico, y a bula over di e muraya. E preso aki ta ruman homber di Jose, esta Cesar Ventura.
Inmediatamente alarma a ser bati, y segun e draaiboek nan a core notifica Polis di loke a pasa, y a duna indicacion den ki direccion e preso a cuminza mobiliza. E informe a yega cerca Polis pa 12:15 pm.
Tambe na mesun momento a notifica CEA Aruba, y tambe demas oficialnan di Prison di KIA pa acudi na e lugar pa yuda cuida e poblacion den e cuatro murayanan, y alavez evita cu mas cos por socede.
Mientras tanto, Helicopter di Polis tambe a lanta vuelo pa cuminza busca den e area.
Henter e area pariba di prison di KIA ta hopi seco e dianan aki, cu masha poco mata. Excepto di e area como 70 meter pariba di e prison, net na e bahada.
Como cu aki tin un tubo di awa di drenahe ta core for di e Prison, tur dia di aña tin un mini-mondi di principalmente mata di druif cu a crece eynan. E ta un area di 100 meter hundo, y 96 meter largo, cu ta dunabo un resultado di como 9.600 meter cuadra di mata.
Dado momento autoridadnan cu a aglomera rond di e mini-mondi aki, a bin mira movimento tambe, y asina a notifica demas patruyanan y tur hende a cera e salida hermeticamente.
Oficialnan halto di KIA a yega y via e sistema di P.A. (Public Address Speakers), a dirigi palabra na e preso pa informe cu e no por huy di eyden mas, como cu Polisnan tin tur skina seya, y for di halto tin Helicopter ta vigilando.
E preso Cesar Ventura no a contesta, y no a sali tampoco.
Mientras tanto, algun agente a dicidi pa bay drenta nan mes y purba di confronta e preso. Na final un oficial di unidad di K-9 di Polis a logra di yega cerca, y a ordena e preso pa e sinta na tera. Pa 1:45 pm el a informa Central di Polis cu el a detene e preso Cesar Ventura, y tin boei na su mannan.
Vocero Policial Lito Lacle a bisa cu mesora despues di a gara Cesar Ventura, a sak’e di e mini-mondi aki, pone den un unidad y a ser transporta bek pa Prison di KIA. No ta conoci si acaso den e 90 minuut ey cu e tabata den libertad, si el a sikiera purba algun fruta di druif colga den e matanan. Riba e potret por mira momento cu Polis K-9 ta pone boei na e man di e preso.
Lacle a bisa cu e tabata un tremendo coordinacion entre Polisnan di diferente Departamento hunto cu personal di prison di KIA.
Den pasado ta conoci, cu unavez un preso trata na huy, pa e siguiente simannan e lo bay ta pasando su dianan den cambernan solitario, conoci como ‘cashot’.
