ORANJESTAD (AAN): Manera a ser treci dilanti caba, e grupo di Comerciantenan Uni, y tambe casi tur gremio na Aruba a expresa su den linea grandi,
nan ta di acuerdo pa bin cu un tax tipo BTW riba e isla, como cu e lo bay percura pa tur hende paga nan fair share.
Sinembargo, un BTW halto lo no ta consehable e momento aki. Net awor cu tin guera entre Rusia y Ucrania cu a pone hopi material bira scars, y cu tin keto bay lockdown y problema logistico na Asia pa cu transporte di material.
Nan posicion ta pa mihor laga e BTW keda cu un solo tarifa, esta algo simple, pa asina evita cu negoshinan lo haya nan mes ta haci extra mas gasto pa bay procesa multiple-tarifa di BTW cu aparentemente Gobierno tin pensa di bin cune.
Frans Ponson di Comerciantenan Uni a indica cu di cuminzamento di aña caba e inflacion na Aruba ta “through the roof”, y a menciona e prijs halto di gasolin.
“Ami no sa con hendenan ta handle e inflacion, anto Gobierno ta bin pone un BTW di 14%, e ora ciudadanonan no por haci nada otro,” Ponson a bisa. Situacion pa tur hende lo bay bira imposible.
E vocero di Comerciantenan Uni profundamente ta lamenta cu Gobierno no a djis busca opinion di nan, y di resto di gremionan prome cu nan a subi e caminda pa busca forma con ta implementa BTW. E ta calcula cu tur cos lo a bay mucho mas simple, si acaso a check cu stakeholders prome, cu a gasta asina hopi tempo pa bin awor cu e supuesto tax nobo di BTW anto di 2 diferente tarifa.
Awor tin tur e complicacionnan aki, djis pasobra Gobierno a opta na comienzo pa no scucha input di ningun gremio.
