‘Startups’ den centro di diversificacion cu apoyo di incentivonan nobo

Mary-Ann Falconi-Rasmijn

ORANJESTAD (AAN):  Mary-Ann Falconi-Rasmijn, Co-fundadora y Directora General di Impact Hub Aruba, ta señala cu a base di su experiencia diario cu entrepreneurs y startups, e mayor reto di haci negoshi den un economia chikito no ta falta di ideanan, sino limitacion di capacidad, tempo y espacio pa crecemento sostenibel.

   Desde 2022, Impact Hub Aruba a enfoca su trabao riba trata e reto aki di manera directo, acompañando startups den fase inicial y yudanan fortalece capacidad, structura y preparacion pa crecemento gradual y responsabel den e contexto economico di Aruba.

   Doñonan di companianan chikito hopi biaha ta enfrenta un ‘runway’ financiero limita, fragmenta y cu un presion grandi pa cumpli cu su debernan comercial, administrativo, y fiscal, prome cu nan haya e oportunidad pa comprende completamente e mercado, y por adapta modelo di negoshi. Como entrepreneur, bo ta den pleno operacion di bo propio compania, enfoca riba sigura ingreso mensual y asumiendo diferente rol y responsabilidad cu e negoshi ta exigi diariamente. Den e contexto aki, preparacion y crecemento gradual no ta un opcion, sino un condicion esencial pa startups por stabilisa, mantene continuidad y evoluciona.

   Como organizacion cu ta opera na e centro di e ecosistema di entrepreneurship, Impact Hub Aruba a concentra su esfuerzonan riba fortalece capacidad empresarial, guia startups den fase inicial y prepara nan pa crecemento gradual y responsabel. Impact Hub Aruba a sirbi den 2025 mas di 251 entrepreneurs, di cual ta conta cu un miembrecia actual activo di 50 startups, cu ta bishita y haci uzo di recursonan manera, training, co-working space, y business coaching, diariamente. Despues di dos programa di incubacion exitoso, y di sostene startups den exterior, ta hopi cla cu startups na Aruba tin talento, determinacion y hopi idea innovador. Pero sin sosten structural y espacio pa siña y crece, e potencial aki probablemente no lo wordo desaroya na su potencial real.

   Den e contexto aki, Gobierno di Aruba a drenta aña 2026 introduciendo un pakete di incentivonan fiscal, incluyendo e startersregeling y otro medida relaciona cu Free Zone, marcando un paso importante pa fortalece e condicionnan pa companianan cuminsa, stabilisa y crece, segun standarnan fiscal internacional.

   Preparacion: E startersregeling, aunke esencialmente un incentivo fiscal, ta habri espacio pa startups concentra su energia riba loke ta berdaderamente crucial den su fase inicial: construi ekipo, valida demanda, establece operacionnan y siña pa medio di ‘trial, error’, y ‘pivot’. Esaki ta corehente cu literatura internacional, cu ta mustra cu un base solido y espacio pa siña ta aumenta e resiliencia y e posibilidad di crecemento sostenibel di un startup.

   Den un economia chikito, unda mercado local ta limita, e calidad di e preparacion inicial ta determina con leu un startup por yega. Pa cu esaki, incentivonan cu ta reduci presion financiero den e prome añanan ta hunga un rol importante, pero semper como parti di un proceso mas amplio di desaroyo.

   Incentivonan ta mas efectivo ora nan ta integra den un ecosistema solido.  Na mes momento, experiencia local y internacional ta mustra consistentemente cu incentivonan fiscal so no ta suficiente pa construi un ecosistema di startups sostenibel. Investigacion pa institucionnan manera OECD y World Bank ta señala e importancia di organizacionnan intermediario cu ta traha di cerca cu startups, y cu ta yuda nan traduci ideanan, ambicionnan y modelonan di negoshi na practica.

   Esaki ta exactamente e espacio unda Impact Hub Aruba ta opera desde 2022. A traves di compromiso diario cu entrepreneurs, programanan di incubacion, community building y partnerships, Impact Hub Aruba a enfoca riba fortalece e fundamentonan cu startups mester pa por uza e oportunidadnan disponibel di un manera efectivo. Esaki ta inclui claridad strategico, preparacion operacional, acceso na network y preparacion pa e proximo etapa ora e momento di crecemento yega.

   Pa desaroyo di startups, propiedad intelectual ta un consideracion clave, particularmente pa emprendementonan creativo y tecnologico. Impact Hub Aruba ta reconoce e rol importante cu propiedad intelectual por hunga den proteha trabao original y crea balor sostenibel a largo plazo. Den e realidad practico, sinembargo, e mayoria di startups ta enfoca den su fase inicial riba valida e mercado, logra stabilidad operacional y desaroya un modelo funcional. Propiedad intelectual ta bira gradualmente mas relevante conforme e negoshi ta crece y su posicionamiento den mercado ta solido. Den caso cu e creaccion of marca for di comienso ya caba tin un balor grandi pa cu propiedad intelectual, eora no solamente ta relevante, pero necesario pa proteha e balor cu a wordo crea. E incentiva no ta aplica y probablemente no ta necesario mas pa e potencial financiero di e compania.

   Pa Aruba, como un economia chikito cu infrastructura limita, y cu e obligacion pa cumpli cu regla fiscal internacional, e tratamiento di propiedad intelectual den incentivonan fiscal mester wordo maneha cu cautela. E enfoke actual ta riba actividadnan cu base real di servicio y operacion, como un manera pa mantene credibilidad y evita consecuencia internacional. E diseño di e startersregeling, pues, ta stimula cumplimiento y stabilidad, no pa limita creatividad, pero pa sigura y reconoce cu preparacion y crecemento gradual ta esencial den nos contexto economico.

   E incentivonan fiscal nobo ta crea momentum. Pero pa esey traduci den crecemento sostenibel, lo depende di con Gobierno, partnernan di ecosistema y entrepreneurs ta move hunto pa dilanti.

Impact Hub Aruba lo sigui cumpli cu su rol como partner strategico: brindando sosten continuo na partners y den e ecosistema, fortaleciendo capacidad y traduci oportunidad den crecemento real. E organizacion su experiencia ta mustra cu ora incentivo y sosten di ecosistema ta traha den alineacion, startups ta miho prepara. No solamente pa cuminsa, sino pa mantene continuidad y evoluciona. Aki mes ta keda e potencial berdadero di e incentivonan: no solamente como instrumento fiscal, sino como parti vital di un ecosistema mas amplio, resiliente y sostenibel. Esaki ta habri espacio real pa sectornan nobo crece y pa un economia diversifica y prepara pa futuro.