ORANJESTAD (AAN): Tur cos a cuminza dia 29 di December 2025, e clientenan a haya sa pa medio di e medionan di comunicacion,
cu lo produci un aumento den e seguro di AOV te na un maximo di 1.000 Florin Curasoleño (Caribbean Guilder).
E pago di aumento di e suma maximo lo a tuma luga Dia 15 di januari di 2026. E aumento lo ta valido solamente pa e residentenan di Curaçao. Te cu awe, e clientenan no a ricibi diferencia den nan subsidio.
Aparentemente, locual a sali publica den medionan di comunicacion, SVB tambe ta aplik’e. Sinembargo, e clientenan ta considera cu e forma di procede aki ta inaceptable y nan ta desea pa SVB, conforme e articulo 37 di Landsverordening Algemeen Ouderdomspensioen, duna por escrito un respectivo decision, p’ asina nan establece formalmente un postura y por presenta un obhecion of apelacion.
Den pasado nan a paga prima pa por ricibi AOV. Segun prudencia huridico di Tribunal Europeo, derecho di AOV ta considera un derecho di propiedad (articulo 1 di prome protocol EVRM). Esaki ta nifica cu pa cualkier cambio, specialmente si ta trata di un eventual aumento, nan lo tin derecho riba esaki. Faborece unicamente e residentenan riba e no residentenan ta discriminatorio.
E aumento ta considera un compensacion pa e subida di costo di mantencion. Esaki a aumenta pa tur isla, no solamente na Curaçao. Tanto e residentenan como e no residentenan a paga e prima.
Pa resumi, e clientenan ta solicita pa SVB informa nan mediante un decision por escrito dentro di un tempo rasonabel, si nan lo ricibi ainda e diferencia den e suma basico aumenta pa e seguro di AOV.
