Stanley Dabian ta anuncia e prome “Aruba Dance Congress” organiza pa Stichting Baila Aruba

ORANJESTAD (AAN) – Stanley Dabian, Relacionista Publico di Departamento di Cultura (DCA), a yama un conferencia di prensa, hunto cu Anthony Mezas, Director di Aruba Danza Studio

y tambe di Stichting Baila Aruba. Den e rueda di prensa aki nan a elabora tocante un actividad cu ta pa Aruba den su totalidad: “Aruba Dance Congress”.

Esaki ta bay ta e prome biaha cu un Congreso asina ta tuma lugar na Aruba, y e lo ta na ritmo di Salsa y Bachata.

E actividadnan aki lo cuminza dia 27 di Augustus unda ta bay tin e preliminar pa selecciona e campeonnan mundial y dia 1 di September lo tin e certificacion pa e campeonato.

Dabian a indica cu ta hopi importante pa pensa un rato cu den arte ta conoci cuater disciplina: Arte visual, Baile, Musica y Teatro. “Y den e Congreso aki, por haya un mezcla bibo y fuerte di loke ta arte visual, baila pa contagia bo cu ta e musica cu ta salsa y bachata”, e PR di DCA a splica.

Ademas, durante henter e evento aki por haya tayernan, presentacion di e “big show” unda cu tin  personanan internacional cu lo ta na Aruba, y e ta tanto pa hende local como turista, participa.

“DCA ta mira esaki como algo hopi importante pa Aruba, pa locual nos ta duna apoyo facilitador den e evento aki. Y mas cu claro, e deseo cu señor Anthony Mesas tin, ta pa crea un enfoke pa Aruba como un destinacion di baile. Akinan, salsa como baile, como musica, pero tambe su cultura rond di dje”, Dabian a señala.

El a agrega cu Stichting Baila Aruba, cu ta promove baile, pero tambe un intencion “biba sano” ta support y duna ayudo pa loke ta trata salud mental, sobrepeso y e salud general y, mas cu claro, na bo talento y disciplina di baile, den su aspecto primordial.

“E intencion ta pa pone Aruba riba mapa mundial, y asina aki riba e mapa di salsa como destinacion di baile tambe” el a reitera.

E prome siman di September tin e siguiente actividadnan, manera Stanley Dabian a menciona nan: Dia 1: competencia; dia 2: tayernan, actividadnan, y e presentacion mayor y grandi. Dia 3:  actividad y 4: final di e Congreso.

“DCA cu su prioridad di arte, cultura y educacion di arte, ta contento cu e Congreso di Baile aki, pa Aruba. Y, mas cu claro, ta aplaudi e iniciativa aki di Stichting Baila Aruba, y ta desea señor Anthony Mezas, y su directiva, exito pa esaki.