Jeffrey Schuilenburg di Ministerio di Labor:
ORANJESTAD (AAN) – Jeffrey Schuilenburg, como representante di Ministerio di Labor, a participa den e conferencia di prensa, unda pueblo a wordo informa tocante e Feria di Trabao, cu lo tuma lugar Dialuna proximo, 20 di Juni, organiza pa Food & Beverage Association, cu presencia di DPL (Job Center).
E funcionario a comenta cu mas of menos un aña pasa, el a wordo acerca pa e Secretario di F&B Association (Semi), cu e idea di bin cu un “Job Fair”.
Esaki tabata net e momento cu e prome ola di e pandemia a pasa, y cu a cuminza wak positivamente padilanti cu e dolor di cabes di e pandemia ta tras di lomba.
E tempo ey nan a cuminza wak di biaha kendenan ta esnan involucra pa haci e “Job Fair”, y a pidi, entre otro, DIMAS, Departamento di Labor (DPL) y Departamento di Asunto Social, pa hunto por realiza e Feria di Trabao aki.
Lamentablemente, Schuilenburg a remarca, e pandemia a bolbe dal y e ora ey no tabata mucho productivo pa F&B “pasobra kico nan lo a haci cu trahado si un bez aki nan lo mester a mande cas bek”.
“E aña aki toch ta bay tin un high season basta alentador pa Aruba, e asunto di e pandemia mi ta kere awor si nan lo bay wak tras di lomba, muy pronto. Dus mi a haya un yamada bek di Semi puntre ki hubo si e aña aki lo bin cu e feria. Mi a bise cu e ta mustra cu e ta refleha algo positivo, despues di tanto tempo cu hendenan ta sin trabao”, Jeffrey a comenta.
El a referi na diferente tema di cual el a scucha preguntanan di prensa, y di nan ta esun di permiso. “Eynan mi ta kere cu boso tur sa e problemanan cu tin na DIMAS, y manera boso mes por a wak ni ayera ni awe, nos no a haya representante di DIMAS pa contesta e preguntanan over di permiso.
Pero, nos tin hopi hende na cas cu ta hendenan local, y residentenan cu tin un permiso y no por haya trabao. Esakinan ta e promenan yama pa asisti na e Feria di Trabao aki”, e representante di Ministerio di Labor a subraya.
