St. Maarten cu bishita laboral na DMH Aruba den preparacion cu nan implementacion di Codigo di Proteccion

ORANJESTAD (AAN): Awendia trahamento hunto den colaboracion estrecho, eficiente y cooperativo cu e islanan den region ta sumamente importante,

specialmente mirando cu ta trata di articulo 18 di e Tratado di Derecho di Mucha, cu ta para pa proteccion y siguridad di nos muchanan.

   Den cuadro cu esaki y a base di peticion di St. Maarten, Departamento di Mucha y Hoben (DMH) a prepara un bishita laboral di 4 dia intensivo pa señora Kimberly Brown Dort, cu ta directora di Department Head Court of Guardianship, esta Voogdijraad y tambe señora Neidi de Carvalho, como e ‘Child Protection Specialist UNICEF Netherlands’, estableci na Sint Maarten.

   Meta di bishita laboral: E meta principal tabata pa Sint Maarten haya conocemento, e mihor practicanan, conseho y inspiracion relaciona cu e proceso, procedura y fluho di trabao, cuadro huridico, fase di implementacion for di comienso te unda Aruba ta actualmente y e trainingnan y/of sesionnan interactivo relaciona cu esaki, cu nan lo por uza den nan proceso, cu ta inicia e aña aki tambe.

   Na final di cada dia, nan tabata haci un evaluacion propio tambe y haci e preguntanan adicional relevante.

   Instancianan bishita: E instancianan cu a bishita tabata: (*) DMH mes pa elabora riba e proceso general di comienso te unda nos ta para awor, incluyendo e structura duradero y sostenibel di CdP via e Supervisor di Codigo;  (*) KPA (Korps Politie Aruba) a elabora con CdP ta incorpora for di momento cu un notificacion drenta na nan meldkamer;  (*) SKOA a elabora tocante e implementacion di CdP y nan maneho interno den tur nan respectivo scolnan;

Bureau Sostenemi, como nos AMK.

   Eugene Clementia di Universidad di Aruba a enfoca riba e aspectonan mas importante y relevante di su investigacion di Maltrato di Mucha na Aruba como tambe e 0-meting di CdP den veld.

  DVR (Directie Voogdijraad) a indica nan proceso laboral y incorporacion di CdP, como tambe a combersa tocante voogdijraad na Sint Maarten vs Aruba;

Dr. Horacio Hospital a amplia con CdP ta incorpora for di e momento cu un mucha of un mayor (kindcheck) drenta Prome Auxilio;

   Telefon pa Hubentud a splica importancia di CdP y kico tur nan ta haciendo como tambe e documento di Participacion di Hoben den relacion cu CdP.

Mas cu claro a keda falta 2-3 instancia mas, pero debi na tempo y/of otro factor laboral, esaki no a logra y St. Maarten lo acerca nan individualmente, paso DMH a indica cua instancia tabata crucial pa nan ta involucra den nan trayecto. 

DMH kier gradici tur instancia p’e tremendo oportunidad y tempo durante e bishita laboral aki.