ORANJESTAD (AAN): Añanan ta sigui pasa y e tereno di refineria na San Nicolas ta keto bay fuera di uso.
Oficialmente ningun negoshi ta operando eyriba. Despues cu a haci un chekeo rond mundo pa un Expression of Interest, a bin haya algun compania cu ta dispuesto pa bin establece na e tereno ey y haci uso di dje pa metanan industrial.
Uno di nan ta e compania di Eagle LNG cu kier a crea eynan un sede pa almacena Gas Natural, y unavez cu e ta aki, e lo por suministra WEB Aruba NV cu e gas mas barata aki tambe pa asina yuda den genera coriente mas economico, compara cu e acostumbrado Heavy Fuel Oil (HFO) cu ta usando.
President di San Nicolas Business Association, esta Andres Hernandez a indica cu e meta di nan ta pa cueste loke cueste e zona zuidoost di Aruba haya bek movimento riba e tereno aki pa asina e wiel di industria cuminza draai bek. Esey ta sin importa ki tipo di negoshi bin establece eynan.
Si acaso Eagle LNG cuminza opera na Aruba, lo tin di bay instala un tuberia for di e zona industrial di San Nicolas y yega te na planta di WEB Aruba NV na Balashi. Aki ta unda cu SNBA keto bay ta mira cu tin cierto reto pa ehecuta esey.
Nan sa cu Eagle LNG ta dispuesto pa bin opera e zona di e refineria. Aunke Hernandez a splica cu e ultimo combersacion cu SNBA tabatin cu Eagle LNG “no tabata hopi bunita.”
Realidad ta cu ta interesante pa por lo menos cuminza haci uso di e tereno di refineria pa caba. Pasobra si bo mira esaki for di aspecto macro-economico, tin semper oportunidad cu asina cu e tereno ta wordo usa pa meta industrial, cu e otro pida terenonan tambe rapidamente ta haya uso industrial tambe.
Tur esaki lo acelera e proceso pa e tereno di refineria aki lo crea mas aspecto cu ta cla pa ricibi mas negoshi cu ta bay genera otro fuente di entrada pa e isla, y pueblo di San Nicolas.
